Administradór Munisípiu Manufahi, Arantes Isaac Sarmento no veteranu, Komandante PNTL Munisípiu Manufahi, Superintendente, Júlia Gama simu Prezidente Parlamentu Nasionál, Arão Noe de Jesus, hodi partisipa serimónia reflesaun konsulta populár iha Luak Don Boaventura-Manufahi, sesta (16/08/2019). Imajen/Eugénio Pereira

MANUFAHI, 16 agostu 2019 (TATOLI)- Prezidente Parlamentu Nasionál, Arão Noe de Jesus Amaral, husu ba Manufahi oan  atu prepara rekursu umanu hodi bele hola parte iha servisu dezenvolvimentu indústria refinaria  ne’ebé sei dezenvolve iha Betano.

Notísia Relevante : Povu Manufahi Dada Bandeira CNRT iha Luak

Katuas lian na’in sira partisipa serimónia kompetisaun dansa kulturál iha Luak Don Boaventura-Manufahi, sesta (16/08/2019). Imajen/Eugénio Pereira

“Ita Manufahi oan tenke kaer metin slogan “Adeus Konflitu, Benvindu Dezenvolvimentu” tenke sai objetivu prinsipál atu atinje dezenvolvimentu ho di’ak, para ita Same oan prepara aan hola parte iha dezenvolvimentu boot ne’ebé sei mai hahú husi Suai Supply Base, Refinaria Betano no LNG iha Beaco-Viqueque,” afirma Arão  Noe de Jesus iha ámbitu serimónia reflesaun loron konsulta populár ba dala-20, ohin, iha Luak- Don Boaventura, Manufahi.

Arão subliña katak, konsulta populár mai istória importante ida husi prosesu naruk no prosesu ikus liu maka Maun Boot Kay Rala Xanana Gusmão halo hodi hakotu fronteira marítima ho Austrália no fronteira rai ho Indonézia.

“Iha 2021 (Kompañia Timor Resource) ita sei fura tan mina matan lima iha Kosta Súl ne’ebé pertense ba Suai no Same, tanba ne’e, ha’u hanoin reflesaun ba ita tenke prepara aan simu no servisu iha fatin sira ne’e,” tenik Arão.

Timor GAP no Autoridade Nasional Petróleu no Mina-rai (ANPM)  rasik fó sai ona iha bloku A Munisípiu Covalima ho Bobonaro no Bloku C iha Manufahi no Ainaro hola parte ona, no kompañia hola ona rejime kontratu husi produsaun nian ba Timor Resources Pty. Ltd no Kompañia Austrália hola parte husi Napeon Gropu no Bloku B haruka ona ba Timor GAP Onshore Block, subsídiu ida hosi petroleum public enterprise Timor-Leste nian (Timor GAP, bloku C iha zona Betanu Alas ho Hatu-Udo nian.

Agradese Ba ONU-Portugál

Iha serimónia reflesaun ho tema “Husi Ahu Kadesan Hametin Unidade Nasionál Dezenvolve Manufahi Ba Futuru” partisipa direita povu Postu Alas, Fatuberliu, Same no Turiskai, sosiedade sivíl, lider partidu polítiku, igreja inklui autoridade suku hodi organiza povu partisipa iha atividade oin-oin.

Iha serimónia reflesaun ne’e lider Veteranu Manufahi sira hato’o agradese ba membru Organizasaun Nasoins Unidas (ONU) nian tomak ne’ebé uluk ho apoiu husi Portugál mai hala’o misaun organiza votasaun konsulta populár 1999  iha Same no munisipiu hotu lori Timor manan independénsia.

Veteranu Manufahi, Adriano Corte-Reál fó lembra votasaun konsulta popular iha Manufahi, povu barak duvida no ta’uk tanba militár Indonézia forma ona grupu “ABRAI” (Aku Bela Lestarikan Amanat Integrasi) hodi halo ameasa no intimida povu atu labele vota iha 30 agostu 1999. Maibé, espíritu no kbiit povu kontinua brani hasoru inimigu.

“Indonézia rona atu halo konsulta populár sira atrapalla sira forma forsa regular iha Manufahi ho naran, “ABRAI” atu hata’uk povu no juventude hodi labele vota iha konsulta populár, maibé iha altura ne’ebá povu barani duni tuir votasaun,” Adriano Corte-Reál hateten.

“Agradese ba ONU, Portugál ninia apoiu hosi husi ONU hodi aseita realiza konsulta populár no haruka forsa mai fó seguransa ba konsulta populár,” tenik nia.

Veteranu Manufahi, Francisco Lui Aquileong apresia loron konsulta populár atu fó lembra hikas Timor nian luta.

Aquileong sei lembra bainhira funu nia halo ligasaun ho Maun Boot Kay Rala Xanana Gusmão no Konis Santana no asuwa’in FALINTL tomak hodi kontinua luta.

 Nia dehan, istória rezisténsia sai nu’udar istória no hakerek iha livru istóriku no agora tempu atu hamutuk luta ba dezenvolvimentu.

“Agora tempu ona atu ko’alia kona-ba faze dezenvolvimentu iha Manufahi oan sira maka tenke hamutuk atu hala’o,”  Aquileong husu.

Veteranu Reak Leman mós dehan, 30 Agostu ninin no rohan funu tinan 24 nia laran, maske Timoroan barak tenke mate no enfrenta susar oioin.

 “Xanana la moris, ita la ukun aan, tanba nia maka organiza povu halo funu ohin ita halibur hamutuk hodi selebra ho orgullu,” afirma Reak Leman.

Entretantu festa konsulta populár ne’e partisipa  mós husi Membru Dewan Solidaritas Timor-Leste reprezenta husi Patricino dos Reis Fernandes hodi kontra istória organiza polítiku rezisténsia moris atu apoia prosesu luta  ne’ebé harii husi juventude rezisténsia sira tomak.

Ikus liu, Administradór Munisípiu Manufahi, Arantes Isaac Sarmento, lee mós mensajen Prezidente Komisaun Organizadora Kay Rala Xanana Gusmão kona-ba istória rezisténsia sira ne’ebé akontese iha Manufahi no munisipiu sira seluk.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here