Jornalista timoroan hamutuk na’in 36 remata ona formasaun rekolla dadus nian, sesta (16/08/2019). Imajen/Domingos Piedade Freitas

DILI, 16 agostu 2019 (TATOLI) – Jornalista timoroan hamutuk na’in 36 husi mídia imprime, online, televizaun no radiu, ohin, remata ona formasaun rekolla dadus nian atu halo funsaun monitoriza no kontrola finansa públika Estadu nian.

Notísia Relevante : Jornalista Nain 37 Tuir Formasaun Rekolla Dadus

Ana Pinto Martinho, nu’udar espesialista jornalizmu dadus nian iha Centro Protocolar de Formação Profissional para Jornalistas (CENJOR), hateten, formasaun jornalizmu dadus importante tebes ba jornalista timorense no sidadaun ein-jerál, tanba ko’alia kona ba dadus la’ós fasil.

Nia tenik, kursu ne’ebé mak lao durante semana rua ne’e bele ajuda di’ak liu tan jornalista ida idak kona asuntu kobertura oi-oin ho dadus.

Notísia Relevante : Profesóra Portuguesa Husu Jornalista Timoroan Tenke Lee Barak

“Jornalista sira aprende kona ba dadus husi orsamentu jerál estadu (OJE), kreximentu populasaun, edukasaun, ekonomia no seluseluk tan”, afirma ba jornalista sira hafoin kursu formasaun jornalizmu dadus iha ótel Ramelau, ohin.

“Buat sira ne’e importante tebes tanba bele relata ba entidade públikas no governante sira atu bele iha transparénsia”.

Notísia Relevante : Jornalista 30 Sei Sai Benefisiáriu Ba Programa Kooperasaun Triangulár

Espesialista ne’e mós kontinua husu ba jornalista sira atu aplika buat ne’ebé mak aprende ona no nia fó espasu ba jornalista sira karik  la kompriende buat ruma bele komunika liu husi mídia sosiál hanesan  Facebook no messenger atu bele kontinua apoiu malu.

Oportunidade ne’e, Rui Dennis nu’udar Koordenadór Jerál parseria para melloria da Gestão das Finanças Públicas em Timor-Leste (PMFO) katak Institutu Camões hetan finansiamentu husi Uniaun Europeia, agora daudaun dezenvolve hela instituisaun Estadu balun liu husi entidade balun hodi haree kona ba supervizaun finansa publika. Tanba, sosiedade ohin loron presiza informasaun ne’ebé mak rigoroza bazeia ba dadus.

“Ohin, remata ona formasaun ba jornalista sira hodi kapasita sira liuliu kona ba reportajen jornalizmu ba dadus sira, hodi bele publika liu husi televizaun, jornais, online no órgaun komunikasaun sosiál públiku no privadu para atu halo servisu ho efikásia no integridade,” hateten Rui Dennis.

Programa  formasaun ne’e mós hetan apoiu husi instituisaun Estadu mak hanesan Parlamentu Nasionál, Camara de Contas, Prokuradoria Jerál Repúblika, Polisia Sientífika Investigasaun Kriminál (PSIK), Komisaun Anti Korrupsaun (KAK), Inspesaun Jerál Estadu ninian, inklui halo mós kapasitasaun ba sosiedade sivíl no serbisu auditória sosiál.

Iha biban ida nee, Rui Dennis agradese realizasaun formasaun ne’e, liuhusi apoiu SEKOMS, Konsultóriu da Lingua Portuguesa no sentru formasaun husi Portugal CENJOR. Formadóra mak Ana Pinto Martinho, no durasaun ba kursu hamutuk oras 60.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here