Membru Konsellu Estadu Timor-Leste, Naimori Bucar. Imajen/Eugénio Pereira

AINARO, 16 agostu 2019 (TATOLI)- Membru Konsellu Estadu Timor-Leste, Naimori Bucar, husu ba foin sa’e (otas foun) sira atu labele uza média sosiál Facebook hodi ataka lider Timoroan hanesan, Prezidente Repúblika, Francisco Guterres “Lú Olo”, Kay Rala Xanana Gusmão, ho Mari Alkatiri.

“Labele uza Facebook para ‘insulta’ ita nia Prezidente Repúblika, ita tenke tane nia, promove nia no kaer metin, tanba nia reprezenta ita tomak. Ita labele lori polítika atu hatún ita nia prezidente. Maluk sira se agora ita agora ko’alia aat ita nia lideransa sira, aban bairua ita sai lideransa ema seluk sei ko’alia aat liu fali ita no aban bairua ita oan sira sei la haluha, tanba ne’e Ainaro oan sira tenke soe buat aat, kria domin no dame,” hateten Naimori Bucar iha nia  diskursu selebrasaun festa konsulta populár ba dala 20 iha Ainaro vila, kinta (15/08/2019).

Naimori hatutan, kultura Timor la fó fatin ba Timoroan sira atu trata malu ho liafuan la edukativu, tanba kultura hanorin ema atu respeita malu, tane malu no hadomi malu.

Nia husu ba Ainaro oan sira atu hametin liután dame iha Ainaro hodi bele fó susesu vitória ne’ebé Timoroan tomak deside husi votasaun ba Independénsia iha Konsulta Populár, 30 agostu 1999.

Nu’udar membru Konsellu Estadu, sira sei kontinua apoia Prezidente Repúblika, Lú Olo atu hala’o nia knaar sai prezidente ba povu tomak tuir lei.

“Ainaro oan ita tenke hamutuk haluha pasadu, ita problema ki’ik sira ne’ebé sai luta tenke husik hela ba kotuk, atu ita hanoin ba futuru Ainaro bele sai furak no di’ak,” nia hatete.

Naimori husu inan-aman no edukadór tomak iha Ainaro atu transmite sira nia matenek ba estudante no oan sira atu estuda makas too tempu ruma sai fali lider ukun iha Ainaro ho domin no kria dame.

Parte seluk, nia husu ba povu Ainaro sira atu apoiu mós VIII Governu bele halo nia knaar ho di’ak hodi buka rezolve problema sosiál ne’ebé povu hasoru.

Veteranu Ainaro, Fernando Xavier “Maukoru

Iha fatin hanesan, responsavel veteranu Ainaro, Fernando Xavier “Maukoru” husu ba lider Timoroan, Xanana, Lú Olo, Taur no Mari Alkatiri tenke hamutuk atu hanorin jerasaun foun sira.

“Ha’u husu ba maun boot sira, uluk ita hamutuk maka manan funu, tanbasá agora ita fila kotuk ba malu atu manan saida tan. Tanba ho inimigu iha Indonézia, ita dame malu ona, agora ita konflitu beibeik atu buka saida tan,” Maukoru hateten.

Veteranu ne’e apela ba lider sira tenke respeita povu nia votu, tanba povu fó fiar ba lider sira kaer ukun atu hanorin doutrina edukasaun moral polítika di’ak ba foin sa’e sira atu aprende buat.

“Imi lider sira respeita malu no fó oin ba malu hakuak malu fali ba para povu bele kontente,” nia hatete.

Nu’udar Ainaro oan, Veteranu preokupa bainhira lider sira hatudu drama polítika insultu malu liu husi polítika la fó buat di’ak ba jerasaun foun atu aprende.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here