Institutu Superiór Cristal (ISC). Foto: https://www.isc-tl.com/IN/

DILI, 16 agostu 2019 (TATOLI)- Magnifiku Reitór Institutu Superior Cristal (ISC), Sebastião Pereira hateten katak estudante ISC iha polu Aileu sei utiliza laboratóriu bainhira iha semester III maibé agora daudaun sira foin mak semester I tan ne’e seidauk presiza fasilidade sira ne’e.

“Ami kria ona kondisaun maibé ami seidauk hanoin atu instala laboratóriu agora tanba estudante sira foin mak semester I kuandu sira iha ona semester III mak ami foin Instala,” informa Reitór ISC, Sebastião Pereira ba jornalista Ajénsia TATOLI iha ninia gabinete ISC, Balide, Dili, sesta (16/08/2019).

Reitór ne’e dehan, agora daudaun estudante semester ida ne’e barak liu hasoru teória. Inklui sira ne’ebé mak iha Fakuldade Saúde, Departamentu Enfermajen sei hetan fasilidade husi dosente sira ho boneka manikin.

Tan ne’e estudante enfermajen sira ne’e la’ós tenke hetan kedas fasilidade kompleta mak foin pratika, kuandu iha ona semester III sira foin mak hetan 50% prátika no 50% teória.

Ne’e duni ho kondisaun ISC Polo Aileu enfrenta ne’e la’ós aat liu maibé institutu tenta halo kompleta daudaun ona to’o bainhira estudante sira ne’e avansa ona ba semester tuir mai, fasilidade sira ne’e bele responde ona nesesidade sira.

“Maibé ami mós husu nafatin apoiu governu nian atu tau-matan mai ami-nia kondisaun ne’e tanba estudante sira ne’ebé fasilita daudaun ne’e Timor nia oan tan ne’e Ministériu tenke haree mós kondisaun ne’ebé ami enfrenta”, tenik  akadémiku ISC ne’e.

Reitór Sebastião Pereira ne’e mós esplika katak ninia parte komprende tebes kona-ba lei jurídiku estabelesimentu Ensinu Superiór tan ne’e atividade hotu iha ISC Polo Aileu ne’e la’o ona hodi hadi’a ninia kondisaun no hein resposta husi Ministériu Ensinu Superiór Siénsia no Kultura kona-ba fiskalizasaun Ministru nian.

Notísia relevante:Proposta ISC Demora, MESSK: “Dokumentu Sira Tenke Hetan Avaliasaun”

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here