Diretór Edukasaun Munisípiu Ainaro, Celestino Magno. Imajen/Eugénio Pereira

AINARO, 16 agostu 2019 (TATOLI)- Eskola Sekundária Jerál (ESG-sigla portugés) Katólika Santa Maria Ainaro  hetan primeiru lugár iha kompetisaun sertame nivel Munisípiu Ainaro.

Notísia Relevante : Ainaro Realiza Kompetisaun Sertame Liga ba Istória TL

Estudante sira ne’e konsege hetan primeiru lugar hafoin fó resposta ho valór boot ba matéria ne’ebé komisaun organizadora prepara hodi husu pergunta liga ba istória konsulta populár ho pergunta primeiru etapa 50, segundu etapa 50 no terseiru etapa 10 hamutuk pergunta 110.

Kompetisaun sertame ne’e rasik partisipa direita husi konkorrente Estudante Eskola lima (5) hanesan, ESG Fernando La Sama de Araújo Ainaro, ESG Santa Maria Ainaro, ESG, Santo Inacio Loiola Maubisse, ESG Nain Feto Ramelau Hatobuilico no ESG Nossa Señora de Lourdes Hatoudo.

Sertame ne’e nu’udar atividade ne’ebé pertense ba komemorasaun loron konsulta populár ba dala-20 (30 agostu 1999-30 agostu 2019) no prezensa misaun Forsa INTERFET, 20 setembru 1999.

Diretór Edukasaun Munisípiu Ainaro, Celestino Magno, apresia tanba estudante ESGC Santa Maria Ainaro domina matéria tomak ne’ebé komisaun prepara liga ho istória jerál kona-ba komemorasaun festa konsulta popular ba dala-20 no selebrasaun prezensa misaun forsa INTERFET nian.

Nia dehan, estudante konkorrente na’in tolu husi ESGC Santa Maria Ainaro sei reprezenta Ainaro husi tuir kompetisaun sertame nivel nasionál iha Dili.

Nia dehan, agora daudaun ekipa komisaun organiza koordena fali ho estudante inklui parte mestre husi eskola atu introdús istória jerál ba estudante sira atu aprende kle’an liután istória hotu- hotu hodi hariku sira nia koñesimentu bele prepara sira nian aan tuir kompetisaun iha Dili ho di’ak.

Iha fatin hanesan,  Administradór Ainaro, Albertino de Araújo hato’o parabéns ba estudante sira husi ESGC Santa Maria no husu mós atu labele kontente lai, tanba sira tenke prepara aan atu manan mós iha kompetisaun nasionál iha Dili.

Nia husu atu semana ne’e ba oin estudante sira lee istória barak liután hodi kadi sira nia kakutak  no partisipa iha sertame nivel nasionál iha Dili hasoru munisípiu sira seluk.

 Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here