Embaixadór Japaun ba Timor-Leste, Hiroshi Minami. Imajen: Tatoli

DILI, 16 agostu 2019 (TATOLI) – Embaixadór Japaun ba Timor-Leste, Hiroshi Minami, hasoru malu ho Primeiru-Ministru (PM), Taur Matan Ruak, hodi hato’o despedida tanba hetan ona mandatu foun iha Japaun, maski ninia misaun diplomata iha Timor-Leste seidauk kompleta tinan haat.

“Ha’u hasoru malu ho Primeiru-Ministru, tanba ha’u tenke hato’o despedida. Iha semana kotuk, ha’u simu mandatu foun hosi Governu Japaun. Tan ne’e, ha’u tenke fila hikas ba Japaun iha 13 setembru. Ha’u tenke ramata serbisu hanesan Embaixadór Japaun iha Timor-Leste”, tenik Embaixadór Japaun ba jornalista sira iha Palásiu Governu, sesta ne’e.

Nia hatutan: “Aproveita oportunidade ida ne’e, ha’u hakarak hato’o gratidaun no agradese ba povu no Governu Timor-Leste ne’ebé durante ne’e koopera no amizade ho Japaun”.

Notísia Relevante: Embaxadór Foun Japaun Sei Aprezenta Kredensiál

Hiroshi Minami dehan, kona-ba Embaixadór Japaun foun, Governu Japaun seidauk halo desizaun maibé iha tempu badak sei iha desizaun ruma.

Atuál Embaixadór Japaun aprezenta kredensiál ba Prezidente Repúblika, Francisco Guterres Lú Olo iha 17 outubru 2017, iha Palásiu Prezidensiál.

Governu Japaun nu’udar parseiru dezenvolvimentu ne’ebé ativu tebes iha prosesu konstrusaun Estadu liuhosi Japan Internastional Cooperation Agency (JICA), ne’ebé estabelese iha Timor-Leste.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here