Xefe Departamentu Sirurjia HNGV, Alito Soares. Imajen Mídia GAAC

DILI, 16 Agostu 2019 (TATOLI)—Tuir relatóriu Organizasaun Saúde Mundiál (WHO-Sigla Ingléz), iha tinan 2018, moras kankru susun sai kauza númeru ida ba mortalidade feto iha mundu inklui iha Timor-Leste.

Relatóriu ne’e haudu katak moras kankru susun konsidera sai problema boot ida iha mundu no Timor-Leste.

Aleinde relatóriu ne’e, Timor-Leste rasik iha ninia dadus hosi Hospital Nacional Guido Valadares (HNGV), hatudu katak entre pasiente na’in 300 ne’ebé mak hetan atendimentu ba moras kankru, %15.2 mak sofre moras kankru susun no maiória pasiente sira ne’e mate.

Problema ne’e halo espoza Prezidente Repúblika liuhosi Gabinete Apoiu Atividade Konjuje-Prezidénsia Repúblika, hamutuk ho Ministériu Saúde (MS), Komisaun Nasionál ba Moras Kankru Susun (KNMKS) no entidade relevante sira halo advokasia maka’as kona-ba natureza moras kankru susun, nia síntoma sira, kauza, prevensaun no oinsá halo kurativu.

Sesta ne’e, Gabinete Apoiu Atividade Konjuje (GAAC-sigla portugés) kontinua halo sosializasaun ba prevensaun  moras ne’e iha Munisípiu Dili, liliu iha Sentru Formasaun Polísia Comoro ho partisipante mai hosi  espoza ofisiál PNTL, Polísia Feminina no Formandu Ofisiál.

Durante sosializasaun, médiku Alito Soares, atuál Xefe Departamentu Sirurjia HNGV, ne’ebé tama mós iha komitiva Gabinete Apoiu Atividade Konjuje-Prezidénsia Repúblika nian, iha nia intervensaun haktuir kona-ba síntoma sira ba moras kankru susun nian.

Nia esplika, babain síntoma ba kankru susun mak hanesan katar, moras no susun sai mean, bubu hanesan fatuk, mudansa iha susun matan ka susun, mosu kafuak iha susun, bubu iha parte kalilin no síntoma seluk-tan.

Médiku ne’e husu katak bainhira hetan síntoma sira hanesan ne’e, inan sira tenke ba lalais atu hetan atendimentu hosi fasilidade saúde ne’ebé besik.

Alito haktuir mós katak to’o agora seidauk identifika loloos kauza ba moras kankru susun, maibé iha fatór risku balun ne’ebé bele kauza kankru susun nian.

Nia hatutan, kona-ba fatór risku  sira ne’ebé kauza mak hanesan fatór jenétika, feto ne’ebé nunka ko’us, uza ai-moruk konstrasepsaun, menstruasaun sedu liu ka tarde liu, dieta no mós istilu moris.

Nia fó hanoin katak, hosi fatór risku sira ne’e, iha fatór risku balun ne’ebé  bele prevene, mak hanesan uzu aimoruk kontrasepsaun ka istilu moris.

Maibé, nia hateten, prevensaun boot ida ne’ebé bele halo mak hakbesik-aan ba fasilidade saúde bainhira mudansa la normál akontese ba isin.

Atuál Xefe Departamentu Sirurjia HNGV rekoñese katak,  to’o oras ne’e,  Timor-Leste sei hasoru difikuldade boot tanba mákina atu halo ezame ba moras ne’e seidauk iha inklui espesialista mós seidauk iha. Entaun, alternativa ne’ebé iha mak  presiza edukasaun, formasaun no sensibilizasaun kontinua ba komunidade no ba sidadaun hotu.

Iha fatin hanesan, Espoza Prezidente Repúblika, Cidália Lopez Nobre Mouzinho Guterres husu ba partisipante sira katak bainhira hetan síntoma hosi moras kankru susun, tenke fó hatene ba parseiru moris nian atu buka solusaun.

Tuir planu, programa ne’e sei kontinua ba eskola sira, instituisaun estadu no privadu sira oinsá buka fahe informasaun báziku ba kauza no prevensaun hosi moras ne’e. Ekipa sosializadór sira mak hanesan GAAC, HALIKU no Xefe Departamentu Sirurjia HNGV, Alito Soares.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here