Prezidente Asosiasaun Komersiante Komunidade Xineza Timoroan, Kathleen Gonçalves. Imajen espesiál

DILI, 15 agostu 2019 (TATOLI)—Prezidente Asosiasaun Komersiante Komunidade Xineza Timoroan, Kathleen Gonçalves, hateten negosiante sira sei hetan dezafiu iha lejizlasaun balun bainhira atu hala’o atividade komérsiu.

“Dezafiu ne’ebé hasoru iha rai laran mak Lei Rai ne’ebé iha ona, maibé seidauk implementa. Importante ba negosiante sira atu iha serteza ba sira-nia investimentu, no mós lei seluk atu proteje negosiante iha Timor-Leste, tanba dala-barak asesu ba finanseiru sai hanesan dezafiu boot ba setór privadu”, nia tenik ba jornalista sira, hafoin hasoru malu ho Primeiru-Ministru (PM), Taur Matan Ruak, iha Palásiu Governu, kinta ne’e.

Nia hatutan: “Kona-ba Lei Rai, agora ita-nia Governu serbisu maka’as tebes atu haree. Espera katak tinan oin ita bele hetan ona sertifikadu ba rai”.

Kathleen Gonçalves hatutan, presiza iha mós lejizlasaun hodi asesu finanseiru ba negosiante sira bele rezolve.

Nia haktuir, audiénsia ho Xefe Governu pozitivu tebes no hetan korajen boot para Komersiante Xineza Timoroan sira bele foku halo investimentu barak no iha tempu naruk.

Emprezária ne’e mós rekoñese, Governu iha ona polítika ida para labele depende ba fundu minarai.

“Agora tenke haree ba setór seluk hanesan agrikultura, turizmu ka setór produtivu seluk hodi sai hanesan prioridade atu dezenvolve ita-nia rai laran”, nia akresenta.

Maski nune’e, nia subliña, komunidade ne’e kontinua sai nafatin parseiru ba Governu, hahú hosi uluk to’o agora no sei kontinua fó kontribuisaun liuhosi komérsiu.

Jornlista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here