Ministra Edukasaun, Juventude no Desportu (MEJD), Dulce de Jesus Soares tara tais no entrega aifunan ba atleta Teófilo Freitas. Imajen Mídia MEJD

DILI, 15 agostu 2019 (TATOLI)—Atleta Modalidade Atletizmu Defisiente, Teófilo Freitas hateten nia parte prontu nafatin kompete iha eventu internasionál maski dadaun ne’e nia hetan ona sertifikadu treinadór nian hosi Federasaun Internasionál Atletizmu fulan hira ba kotuk.

“Loloos ne’e, ha’u sai ona treinadór tanba ha’u iha ona sertifikadu hosi Federasaun Nasionál Atletizmu. Maibé, haree fali ba atleta difisiente seidauk iha entaun eventu nasionál sira hanesan Olimpiade tinan oin ha’u prontu partisipa nafatin no Sea Games iha Filipina mós ha’u sei ba kompete hotu,” dehan Teófilo ba Agência Tatoli iha Jináziu Dili, ohin.

Nia hatutan, bainhira tinan oin fila hosi Olimpiade, nia iha ona hanoin atu sai de’it ona treinadór ba atleta Atletizmu Difisiente nune’e ba oin atleta difisiente bele aumenta barak liu-tan.

“Ha’u iha ona hanoin atu tinan oin, foku loos ona ba treinadór atu fahe fali esperiénsia ne’ebé durante ne’e ha’u iha ba sira nune’e maluk sira hotu bele sai atleta ne’ebé di’ak,” tenik nia.

Fó hanoin fali, iha tinan kotuk, Teófilo susesu hetan medalla osan mean ida iha eventu internasioná Asian Para Games.

Tanba ne’e, Governu liuhosi Sekretaria Estadu Juventude no Desportu (SEJD) aloka ona osan rihun atus ida ($100.000) ba nia.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here