Prezidente Konsellu Administrasaun ANATL, Romualdo da Silva. Foto/Natalino Costa.

DILI, 15 agostu 2019 (TATOLI)-Prezidente Konsellu Administrasaun Ajénsia Nasionál Aviasaun Timor-Leste (ANATL), Romualdo da Silva, hatete reseita ne’ebé ANATL hetan iha tinan ne’e tun kompara ho 2018 tanba movimentasaun iha aeroportu menus.

“Reseita ne’ebé maka ANATL hetan iha tinan kotuk serca de 3 milhões e tal, agora, tinan ne’e ita hotu hatene katak aviaun komesa para ona, movimentu pasajeiru husi estranjeiru  komesa menus, reseita ladún hetan. Tinan ne’e 2 milhões, maibé ANATL rasik kontinua esforsu, koordena ho ministériu hodi nafatin la’o bá oin”, Prezidente Konsellu Administrasaun ANATL afirma iha Komoro, ohin.

Romualdo salienta iha 2019, aviaun Singapura mós para no aviaun ne’ebé semo bá-mai ema ladún iha, nune’e afeta ba reseita.

Tanba ne’e maka ANATL tenta buka nafatin no servisu hamutuk ho ministériu sira liuliu Ministériu Turizmu, Komérsiu no Indústria (MTKI) no Autoridade Aviasaun Sivíl Timor-Leste (AACTL, sigla portugés) oinsá atu buka meiu komunikasaun nune’e aviaun bele tama tan.

“Ida ne’e maka ami tenta halo hela, espera katak tinan ne’e nia laran ami bele esforsu para aviaun ida rua tama tan nune’e reseita ba ami iha no mós ita-nian populasaun bele hili bá ho aviaun saida, bele iha presu kompetitivu”, Romualdo salienta.

Daudaun ne’e, iha de’it aviaun rua entaun presu ne’e ladún iha kompetitivu no futuru kuandu iha aviaun rua tama tan, presu ne’e kompetitivu liu, bele tun tan, nune’e sei atrai ema barak bá li’ur no barak maka mai.

Aléinde ne’e sei koordena ho MTKI no liña ministeriál sira seluk atu kria atividade oioin, nune’e bele dada ema rai-li’ur mai.

Notísia relevante : Movimentu Ema Tama-Sai Iha Aeroportu Tun

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here