Prezidente Autoridade Nasionál Petróleu no Minerál, Gualdino da Silva. Imajen/TATOLI.

DILI, 15 agostu 2019 (TATOLI) – Prezidente Autoridade Nasionál Petróleu no Minerál (ANPM), Gualdino da Silva, esplika kuandu dezenvolve kampu greater sunrise, Timor-Leste (TL) hetan porsentu 70 no Australia ho porsentu 30, tanba liña klaran (median line) hafahe iha área greater sunrise.

“Timor-Leste ho Australia tenke fahe reseita tanba liña klaran hafahe iha área greater sunrise, balun tama iha Australia nia parte ka soberania maske maioria tama iha área Timor-Leste” Gualdino da Silva ba Ajénsia Tatoli hodi hatan ba dúvida públiku, iha Novo Turismo.

Hodi esplika tan 70% ba TL no 30% ba Australia, kuandu esplorasaun greater sunrise iha TL, maibé bainhira esplora iha Australia maka TL sei hetan 80% no Australia ho 20%.

Maske nune’e, maibé TL ho Australia jere hamutuk nafatin ba esplorasaun greater sunrise tanba desizaun hotu afeta ba malu.

“Mezmu fahe reseita maibé presiza duni ita jere hamutuk tanba ita nia desizaun afeta Australia nia parte no Australia nia desizaun afeta mós mai ita Timor-Leste”katak.

Enkuantu, líkidu ka gas maka laiha kooperasaun ba esplorasaun maka Australia mós supa rasik ninian, entaun TL nian mós tuun ka hotu, nune’e mós hanesan TL, katak supa ka esplora signifika Australia nian mós hotu.

Antes ne’e, Parlamentu Nasionál (PN) aprova ona Proposta Rezolusaun númeru 2/V, kona-ba ratifikasaun tratadu TL ho Australia, ne’ebé estabelese respetiva fronteira marítima tasi timór.

Nune’e, iha anexu B kona-ba rejime espesiál ba greater sunrise, iha artigu 2 ko’alia kona-ba propriedade no fahe reseita, iha alínea dahuluk, hateten petroleum ne’ebé produzidu greater sunrise hanesan propriedade TL ho Australia.

Entretantu, iha artigu 5 kona-ba entidade regulatóriu sira ba greater sunrise hateten parte hirak estabelese prezente tratadu estrutura regulatóriu hosi nivel rua atu halo regulamentasaun no administrasaun hosi rejime espesiál greater sunrise nian, kompostu hosi Autoriade Dezignada ida no Konsellu Supervizaun ida.

Jornalista: Florencio Miranda Ximenes

Editora   : Maria Auxiliadora

HAKEREK NO HATÁN

Please enter your comment!
Please enter your name here