Prezidente Repúblika, Francisco Guterres Lú Olo. Imajen António Gonçalves

DILI, 15 Agostu 2019 (TATOLI)—Prezidente Repúblika, Francisco Guterres Lú Olo, ohin, promulga ona Primeira Alterasaun ba Lei nú. 3/2014, 18 juñu, ne’ebé kria Rejiaun Administrativa Espesiál Oé-Cusse Ambeno (RAEOA) no estabelese Zona Espesiál Ekonomia Sosiál Merkadu (ZEESM) no Ataúro.

Komunikadu ne’ebé fó sai hosi Palásiu Prezidente Nicolau Lobato, Dili, 15 agostu 2019, hateten, Parlamentu Nasionál halo revizaun ba artigu rua hosi lei refere relasiona ho nomeasaun  no ezonerasaun Prezidente RAEOA-ZEESM hosi Prezidente Repúblika ba Governu. Primeira alterasaun ba Lei nú. 3/2014 aprova iha Parlamentu Nasionál iha 8 jullu 2019.

Lee mós: TR Deklara Alterasaun Lei RAEOA Konstitusionál

Iha 29 jullu 2019, Prezidente Repúblika envia Primeira Alterasaun ba Lei númeru 3/2014 hodi husu Tribunál Rekursu atu halo fiskalizasaun preventiva ba konstitusionalidade.

Maibé, iha 14 agostu 2019, Tribunál Rekursu haruka akordaun ba Prezidente Repúblika hodi deklara katak laiha inkonstitusionalidade ba Primeira Alterasaun ba Lei nú. 3/2014.

Ho nune’e, ohin, 15 agostu 2019, Prezidente Repúblika promulga Primeira Alterasaun ba Lei númeru 3/2014.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here