DILI, 15 agostu 2019 (TATOLI)-Polisia Nasionál Timor-Leste (PNTL) Munisípiu Liquiça garante hakmatek ho pás durante festa konsulta populár (Referendu) ne’ebé atu hala’o iha Liquiça.
Notísia Relevante : Joven Liquiçá Tenke Kaer Metin Lema ‘Hu Iso, Lara Iso’
Komandante PNTL Munisípiu Liquiça, Superintendente Polísia, Luis da Silva, afirma, nia parte trasa ona planu feitu hodi destaka membru sira atu fó seguransa ba povu durante realizasaun festa konsulta populár ba dala-20 (30 agostu 1999-30 agostu 2019) ho prezensa misaun forsa INTERFET iha Timor-Leste, 20 setembru 1999.
“Agora daudaun parte Polísia halo ona koordenasaun ho Prezidente Autoridade Munisípiu Liquiça atu nune’e buat hotu bele lao ho di’ak,” konfirma Komandante Luis da Silva ba TATOLI iha Kuartél Jerál PNTL, Caicoli, Dili, kuarta (14/08/2019).
Nia deha, komandu fahe ona membru sira ba grupu rua; grupu da-uluk involve diretamente iha parade no grupu da-ruak nian maka atu fó seguransa ba povu durante preparasaun to’o serimónia nia terminasaun.
Tuir nia, situasaun ein-jerál iha Munisípiu Liquiça oras ne’e daudaun lao hakmatek no kontroladu.
Jornalista : Nelson de Sousa
Editór : Francisco Simões
