DILI, 15 agostu 2019 (TATOLI)-Organizasaun Mundiál Saúde (OMS) ho Ministériu Saúde (MS) no mós parseiru dezenvolvimentu sira hala’o workshop hodi prepara programa prioridade ba tinan rua oin mai, 2020 ho 2021, ho total orsamentu ne’ebé prevee ba tinan rua hare liu ba asisténsia téknika.

“Orsamentu ne’ebé mak ami iha ne’e kuaze millaun rua ba atividade nian  no mós ami mobiliza tan dalaruma orsamentu to’o millaun lima ba tinan rua oin mai; 2020, 2021,” dehan reprezentante OMS iha Timor-Leste, Sudath Peiris, ba mídia sira, iha Timor Plaza, Suai Room, Dili, kinta (15/08/2019).

Nia dehan, orsamentu millaun rua ne’e refere ba atividade sira no apoia téknika: “Dalaruma ami bolu peritu sira mai fó asisténsia téknika ezemplu ita atu halo polítika estratéjia ida ne’e ita presiza ema matenek. Entaun orsamentu sira ne’ebé ohin temi ne’e atu fó ba matenek na’in sira hodi nune’e bele ajuda Ministériu Saúde maibé ida ne’e ami tenke diskute hamutuk ho Ministériu Saúde rasik hamutuk hodi haree ba prioridade saida mak ita hakarak”.

“Ami-nia esperiénsia hirak ne’e ami halo iha tinan 2018, 2019, ami hetan orsamentu to’o millaun lima to millaun neen ne’ebé agora ami prevee daudaun ba millaun rua,” tenik reprezentante OMS.

Nia esplika, OMS ba nia programa servisu ba tinan lima oin mai ba tinan 2019 to’o iha 2023 ne’e iha programa ida ne’ebé ita diskute hamutuk ho MS bolu naran biliaun tolu biliaun primeiru hakarak asegura katak servisu saúde ne’e bele fornese ba populasaun hotu-hotu iha mundu tomak signifika ita Timor mós hetan.

“Biliaun segundu atu haree katak moras ne’ebé perigu liga ho emerjénsia tanba moras ne’e dalaruma dezastre kona ida ne’e mós bele hetan protesaun entaun ami sei haree ba ida ne’e. Biliaun terseiru haree ba fatór risku ne’ebé halo ema moras no mate entaun iha Timor mós ita tau prioridade ba ida ne’e,” hateten tan reprezentante OMS, Sudath Peiris.

Sudath Peires afirma tan iha programa prioridade ne’ebé ita haree hamutuk ho MS ita hare hanesan programa saúde primária no programa Saúde Na Família liuliu vizita uma kain ba uma kain hodi haree ba  komunidade sira na’in hira mak iha, hira mak iha risku, no hira mak moras ona la ba konsulta karik ita bele buka sira lori ba tratamentu ne’ebé apropriadu.

No sira ne’ebé iha risku mak ezemplu sira fuma maka’as, hemu tua no sira ne’ebé moris iha ambiente la seguru no sira ne’ebé la hetan vasinasaun hanesan sira ne’ebé hetan moras Malaria, Tuberkuloze HIV/Sida,  Moras Leproza, Hepatitis.

“Moras hirak ne’e ami fó atensaun maka’as tanba ita haree de’it ba nia tratamentu maibé komunidade iha risku ne’e halo advokasia daudaun no ami halo promosaun maka’as no oinsá mak ita-nia juventude sira la bele fuma no hemu tua  tanba ba longu prazu, ita fuma maka’as, hemu tua demais, ida ne’e mak kria moras barabarak. Ida ne’e mak sai prioridade ba iha tinan rua tuir mai,” nia informa.

Jornalista: Felicidade Ximenes

Editór      :  Rafy Belo

HAKEREK NO HATÁN

Please enter your comment!
Please enter your name here