Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 14 maiu 2019 (TATOLI) – Parlamentu Nasionál (PN) ohin loron sei hala’o reuniaun konvokatóriu no eleisaun liuhosi plenária, kona-ba funsionamentu Komisaun Permanente hodi  kompleta meza PN durante resesu.

Prezidente Parlamentu Nasionál (PPN), Arão Noé de Jesus Amaral, informa tuir rezolusaun ne’ebé aprova hatete katak kompozisaun meza Komisaun Permanente nian mak PPN no eleje sekretária meza ida no vise ida, tanba bainhira tama iha resesu Sekretária Meza nain-tolu suspensu.

“Iha eleisaun mak hili fila-fali sekretária meza no vise ida. Bele mós hili fali sekretária meza na’in rua husi sira na’in tolu (meza antes ne’e), tanba sira mós tama iha membru komisaun  permanente”, dehan nia ba Agência TATOLI, kuarta ne’e.

PPN informa tan, reseitu ne’e hahú ona iha loron kuarta (14/8) to’o 15 setembru 2019.

Tuir Konstituisaun RDTL artigu 102 kona-ba kompeténsia Komisaun Permanente, hateten katak komisaun ne’e hala’o serbisu iha periúdu ne’ebé PN para hela funsaun, iha intervalu sesaun nomós iha kazu seluk ne’ebé previstu ona iha Konstituisaun.

Nune’e mós Komisaun Permanente nia ulun boot mak PPN, Vise Prezidente sira no deputadu husi Partidu Polítiku sira, ne’ebé fahe ona hodi hetan reprezentasaun iha PN.

Artigu 102 mós esplika, kompete ba Komisaun Permanente mak akompaña serbisu Governu nian nomós administrasaun, koordena serbisu sira Komisaun Nasionál, no promove konviksaun PNl nian.

Nune’e mós prepara no organiza PN nia sesaun sira, autoriza dezlokasaun Prezidente Repúblika iha rai laran, dirije PN nia relasaun ho Parlamentu rai seluk, autoriza deklarasaun bainhira iha kazu emerjénsia.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here