Médiku no enfermeiru sira iha HNGV lamenta intimidasaun husi família pasiente. Foto TATOLI: Felicidade Ximenes

DILI, 15 agostu 2019 (TATOLI)—Diretór Klínika Hospital Nacional Guido Valadares (HNGV), ohin, informa katak médiku no enfermeiru sira ne’ebé haknaar-aan iha HNGV lamenta aktu husi família pasiente ne’ebé halo intimidasaun verbál no fízika hasoru médiku no enfermeiru sira iha sala pediatria iha ohin madrugada.

“Médiku sira ne’ebé agora marka prezensa iha konferénsia imprensa ne’e husi xefe departamentu médiku espesialista sira no médiku pos-graduasaun sira deskontente no lamenta ba aktu husi família pasiente balun ne’ebé ohin madrugada oras tuku 3:00 relasiona entre médiku sira ho ita-nia pasiente no moras sira ne’ebé mak baixa iha Ospitál Nasionál Guido Valadares,” informa Diretór Klíniku HNGV, dr. Flávio Brandão, ba jornalista sira iha konferénsia imprensa ne’ebé hala’o iha Salaun Enkontru HNGV, Bidau, Dili, kinta (15/8/2019).

Nia dehan, médiku no enfermeiru sira la dun kontente ho aktu ho meius sira ne’ebé mak ita-nia maluk sira mai hatudu iha HNGV.

Iha fatin hanesan, Xefe Departamentu Pediatria HNGV, dr. Milena Lay dos Santos hateten, akontesimentu ne’e akontese iha tuku 3.00 madrugada, ohin. “Kazu ne’e labarik mane idade tinan tolu mai ho moras komplikasaun no ami trata hanesan infesaun grave. Ami la konsege salva nia vida maibé ami hetan intimidasaun verbál no fízika ba iha ami-nia staff doutór sira no mós enfermeiru”.

“Husi ami-nia parte atu hateten de’it katak tratamentu ótimu ona mak ami fó ba pasiente tuir nia nesesidade. Ami lamenta no ami sente triste mós, ami la konsege salva alin ne’e no husi ami hato’o sentidu kondolénsia ba família liuliu ba inan-aman sira,” dehan Milena Lay.

Maibé, tuir nia, sira mós kondena tebes ba hahalok violénsia verbál no fíziku liuliu dala barak la’ós husi inan-aman maibé tiun ho maluk seluk ne’ebé mak nunka hein permanente pasiente. Ami observa diretamente ba ami-nia tratamentu ba pasiente sira loron ba loron mak ita-boot sira mai halo intimidasaun verbál ho fíziku hasoru doutór enfermeiru ne’ebé fo atendimentu ba pasiente sira, ami deskontente.

Xefe Departamentu Pediatria ne’e, fó mensajen ba inan ho aman katak: “Kuandu lori oan mai Hospital Nasionál Guido Valadares atu baixa tenke fiar uluk ba ami no presiza tebes kolaborasaun hamutuk ho ami. Se la satisfás ka deskontente ho atendimentu saúde ne’ebé mak ami fó, favór hato’o mai ami tuir nia dalan atu hetan esplikasaun loloos.

Nia akresenta, loloos labele hateten liafuan sira ne’ebé la loos iha rede sosiál halo konfuzaun ba iha populasaun nian leet. “Ami mós serbisu klima ne’ebé di’ak no seguru atu ami bele serbisu másimu no fó atendimentu ne’ebé apropriadu tuir pasiente nia nesesidade,” nia konklui.

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here