Sesaun plenária iha Parlamentu Nasionál. Imajen/Dok.TATOLI

DILI, 15 agostu 2019 (TATOLI)—Parlamentu Nasionál (PN), kinta ne’e, liuhusi sesaun plenária, hili ona kompozisaun meza ba Komisaun Permanente durante resesu.

Parlamentu Nasionál aprezenta termu despostu bazeia ba artigu 2 kona-ba regulamentu Komisaun Permanente hodi hili sekretária ida, vise-sekretária ida, nune’e lidera meza PN durante resesu.

Prezidente Parlamentu Nasionál, Arão Noé de Jesus da Costa Amaral dehan ne’e lista únika ba Kompoziaun Meza Komisaun Permanente nian.

Purtantu, deputadu bankada CNRT, Duarte Nunes ho Adérito Hugo da Costa mak propoin ka aprezenta kandidatura únika. Deputadu na’in-rua aprezenta deputada Maria Terezinha Viegas no Rosalina Viegas, avansa ba eleisaun.

Deputadu no deputada sira ne’ebé sai membru ba Komisaun Permanente mak hanesan Arão Noé de Jesus da Costa Amaral, Maria Angelina Sarmento, Luis Roberto da Silva, Duarte Nunes, Maria Terezinha Viegas, José Virgílio, Veneranda Lemos, Maria Fernanda Lay, Adérito Hugo da Costa, Marcos Xavier, Maria Câmara Bisoi, Leandro Lobato, Francisco de Vasconselos, Regina Freitas, Rosalina Ximenes, António Verdiál, Francisco Miranda Branco, Gabriela Alves, Dário Madeira, Lídia Norberta Martins, Antoninho Bianco no Cidália Mesquita, David Diaz Ximenes, Noémia Siqueira, Joaquim dos Santos, Maria Anabela, José Pacheco Soares, António da Conçeição, Adriano do Nascimento, Gilman Exposto dos Santos no António de Sá Benevides.

Hafoin eleisaun, rezultadu votasaun afavór 19, kontra 0 no abstensaun 3, ho totál buletin votu 22 hosi 31 deputadu membru Komisaun Permanente nian.

Deputadu ne’ebé sai membru Komisaun Permanente la marka prezensa ka falta iha eleisaun ne’e mak hanesan deputadu Adriano do Nascimento, Gilman Exposto dos Santos, António de Sá Benevides, Maria Câmara Bisoi, Lídia Norberta Martins no Antoninho Bianco.

“Ami deklara eleita Maria Terezinha Viegas hanesan Sekretária no Rosalina Ximenes hanesan Vise-sekretária. Parabéns”, Prezidente Parlamentu Nasionál dehan hafoin eleisaun ba meza Komisaun Permanente nian, kinta ne’e.

Arão haklaken, Komisaun Permanente nian konstituida ona tuir artigu 4. Nia esplika, Komisaun Permanente sei prezide reuniaun plenária iha 21 agostu. “Kada kuarta durante semana haat ita iha plenária”, hateten Arão Noé.

Funsaun hosi Sekretária no Vise-sekretária mak lidera Komisaun Permanente durante resesu tuir konstituisaun RDTL artigu 102. Deputadu sira tama hikas fali hosi resesu iha 15 setembru 2019.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here