Prezidente Parlamentu Nasionál, Arão Noe de Jesus Amaral. Imajen/António Gonçalves

DILI, 15 agostu 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, hateten ho alterasaun ne’ebé Tribunál Rekursu (TR) deklara konstitusionál, lei fó dalan ba Governu liuhosi desizaun koletiva Konsellu Ministru (KM) hodi bele nomea ema tuan lidera Rejiaun Administrativa Espesiál Oé-Cusse Ambeno (RAEOA).

“Ne’e kompeténsia Primeiru-Ministru nian, Konsellu Ministru bele nomea fali ema tuan mós laiha problema tanba lei fó dalan, maibé desizaun tenke iha Konsellu Ministru”, informa PPN nia ba jornalista sira iha Parlamentu Nasionál, kinta ne’e.

Notísi Relevante: TR Deklara Alterasaun Lei RAEOA Konstitusionál

Nia dehan, alterasaun ne’e la’ós ba estatutu maibé kompeténsia hodi nomea Prezidente Autoridade RAEOA ne’e Governu nian, la’ós ona Prezidente Repúblika.

PPN akresenta, bainhira TR deklara ona katak Dekretu Parlamentu Nasionál nú. 6/V (Alterasaun dahuluk ba Lei nú. 3/2014, 18 juñu), kona-ba kriasaun RAEOA-Zona Ekonomia Espesiál Sosiál Merkadu (ZEESM) konstitusionál, entaun Prezidente Repúblika tenke promulga, laiha tan dalan seluk.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here