Joint Comission Meeting entre Timor-Leste reprezenta husi ANPM ho Austrália ba dala ikus hodi ko'alia kona-ba Projetu Dezenvolvimentu JPDA iha Hotel Novo Turismo, Kinta, 15 Agostu 2019. Imajen/Antonio Gonçalves.

DILI, 15 Agostu 2019 (TATOLI)-Komisária Austrália ba Joint Petroleum Development Area (JPDA) no Sunrise, Lisa Scholfield, informa durante ne’e kooperasaun Austrália ho Timor-Leste (TL) la’o di’ak tebes no sei kontinua apoia tuir nesesidade ne’ebé presiza atu dezenvolve Greater Sunrise.

“Ba Dezenvolvimentu Greater Sunrise ne’e, Austrália sei servisu hamutuk ho Timor-Leste atubele  dezenvolve Greater Sunrise ba oin”, Komisária Austrália ne’e afirma iha ámbitu enkontru dala ikus ba Komisaun Konjunta área JPDA no Sunrise, iha Novu Turizmu, ohin.

Enkontru dala ikus ne’e, nia dehan haree liu dispozisaun tranzitória ba tratadu Fronteira Marítima (FM) ne’ebé durante ne’e parte rua aseita hodi halo apresiasaun no aprovasaun atu fasilita tratadu FM entra iha vigór.

“Tratadu Fronteira Marítima ne’ebé sei entra em vigor tempu badak, área konjunta JPDA ne’e sei tomak pertense ba Timor-Leste nian. Maski nune’e, Governu Austrália ho laran luak no haksolok apoia no suporta nafatin Timor-Leste tuir nesesidade ne’ebé mak iha”, katak.

Iha fatin hanesan, Prezidente Autoridade Nasionál Petróleu no Minerál (ANPM), Gualdino do Silva, informa enkontru ne’e aprezenta ba Komisaun Konjunta entre Timor Leste no Austrália kona-ba rezultadu finál pakote dispozisaun tranzitória iha relasaun ho aneksu D husi tratadu FM no aprezenta mós kontratu hotu-hotu ne’ebé la’o iha JPDA.

“Durante ne’e, ekipa Timor-Leste ho Austrália halo negosiasaun ba dispozisaun tranzitória ne’ebé Konsellu Ministru no Parlamentu Nasionál aprova ona no daudaun ne’e iha gabinete Prezidente Repúblika”, Prezidente ANPM afirma iha ámbitu enkontru ikus ba komisaun Konjunta TL no Austrália.

Tuir nota korrespondénsia entre Timor-Leste ho Austrália iha outubru 2017 katak bainhira prosesu (dispozisaun tranzitória) tratadu Tasi Timór hotu rezultadu ikus tenke hato’o iha Komisaun Konjunta atu fó apresiasaun ikus, molok tratadu foun (Fronteira Marítima) tama iha vigór.

Gualdino dehan aprezenta mós atividade hotu-hotu iha área JPDA liuliu área operasaun iha Bayu-Udan, Kitan no área produsaun 11.1.06.

“Agora daudaun ita iha kontratu iha Bayu-Udan iha rua, Kitan no área operasaun 11.1 .06 ne’ebé iha área konjunta ka JPDA nia laran”, Gualdino afirma.

Komisáriu Timor-Leste ba JPDA no Sunrise, Rui Maria Alves Soares, informa Komisaun Konjunta rai rua ne’e hahú arranja tranzitóriu no haree kontratu sira área JPDA hodi hein tratadu FM tama iha vigór.

Reuniaun dala ikus ne’e, nia dehan, Komisaun Konjuntu haree liu ba arranja sira tranzitóriu sira husi faze Tratadu Tasi Timór ba iha tratadu FM ne’ebé foka liu ba área JPDA.

“Komisaun Konjunta haree liuliu ba kontraktor sira no regulamentu iha área JPDA hodi halo apresiasaun no aprova atu tratadu foun (Fronteira Marítima) tama ein vigór, área JPDA mós tama ona Timor-Leste nia área”, nia afirma.

Tratadu Tasi Timór tama ein vigór iha 2003, Komisáriu TL ne’e dehan, Komisaun Konjunta hala’o enkontru ba dala-51, maibé bainhira tratadu FM tama entra em vigor Komisaun Konjunta mós nia mandatu remata.

“Espera katak ne’e kompromisu husi Governu rua (Timor-Leste no Austrália) katak reuniaun dala ikus ne’e fó dalan ba tratadu foun (Fronteira Marítima) entra em vigor iha 30 agostu”, nia espera.

Komisáriu ba área dezenvolvimentu konjuntu (JPDA) na’in tolu kompostu husi Estadu Timor-Leste na’in-rua hanesan Komisáriu Rui Maria Alves Soares no Cosme da Costa no husi Estadu Austrália mak Komisária Lisa Scholfield.

Kuandu Tratadu Tasi Timór kaduka ka hotu ona hafoin Tratadu FM entra ein vigór, Komisaun Konjunta nia mandatu mós remata ona no sei kria fali konsellu supervizaun.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here