Ekipa Bombeiru rega mate ahi ne'ebeé han motor iha area Hudi Laran, Bairru Pité, Dili, Kinta (15/08/2019). Imajen/Nelson de Sousa

DILI, 15 agostu 2019 (TATOLI)-Komunidade lubun ne’ebé halo atividade iha rea Hudi Laran, Suku Bairru Pité, Postu Administrativu Don Aleixo, Munisípiu Dili, ohin, purvolta tuku 10:00 Otl, hakfodak hodi hobur haree motor marka Versa ho númeru matrikula J.6075, ne’ebé ahi han ‘mutuk’ didi’ak.

Motor ne’ebé ahi han mutuk. Imajen/Nelson de Sousa

Asidente ne’e la rezulta ema kanek no mate, maibé motor mak ahi han to’o la aproveita. Tuir kronolojia katak, motor ne’e nia na’in lori hosi area Timor Blok nian atu ba trata surat iha Ministériu Solidariedade Sosiál no Inkluzaun (MSSI), maibé halai to’o iha area estrada Hudi Laran nian derrepente ahi han no la bele salva motor tanba ahi han ho lalais tebes hodi halo motor to’o ‘mutuk’.

“Ha’u hakfodak, derrepente lori motor hela ahi han husi motor laran,” hatete motor na’in, Domingos Viana, ba jornalista, hafoin akontesimentu.

Domingos hateten, dadeer nia lorin duni motor ne’e ba ofisina hodi halo manutensaun, maibé kona-ba kondisaun motor di’ak hela, hafoin nia lori ba fase motor hotu uza  atu ba servisu to’o iha dalan derrepente ahi ida-idak han motor.

Nia ho espontánea haksoit sai hosi motor leten bainhira haree ahi han hosi motor laran. Nune’e, nia la hetan kanek.

Ekipa Bombeiru to’o kedas fatin akontesimentu hodi rega mate ahi ne’ebé han hela motor ne’e. Nune’e mós Polisia Nasionál Timor-Leste (PNTL) Unidade Tránzitu to’o mós fatin akontesimentu hodi foti dadus ba asidente  ne’e.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here