Prezidente Parlamentu Nasionál, Arão Noe de Jesus da Costa Amaral. Imajen Tatoli/Egas Cristóvão

DILI, 14 agostu 2019 (TATOLI)—Prezidente Parlamentu Nasionál, Arão Noé de Jesus da Costa Amarál, fó-sai katak Prezidente Repúblika Timor-Leste, Francisco Guterres Lú Olo, Prezidente Repúblika Indonézia, Joko Widodo, Reprezentante Prezidente Repúblika Portugés no Reprezentante Sekretáriu Jerál Organizasaun Nasaun Unida (ONU), sei halo diskursu iha Parlamentu Nasionál, 30 agostu.

Nia dehan, Sekretáriu Jerál ONU, António Guterres la marka prezensa, maibé ninia reprezentante sei marka prezensa iha selebrasaun Tinan 20 Loron Konsulta Populár.

Tuir informasaun prévia ne’ebé Prezidente Parlamentu Nasionál ne’e asesu, katak eis Xefe UNAMET, Ian Marthin mak reprezenta Sekretáriu Jerál ONU, António Guterres. Ian Marthin mak lori mensajen ONU nian iha ámbitu selebrasaun Tinan 20 Konsulta Populár.

“Sei marka prezensa hosi Prezidente Repúblika Indonézia, Prezidente Repúblika Timor-Leste nian no Prezidente Asembleia Portugál reprezenta Prezidente Repúblika Portugál no Reprezentante Sekretáriu Jerál ONU nian, sei halo diskursu iha 30 agostu iha Parlamentu Nasionál”,  dehan nia ba Agência TATOLI, iha Parlamentu Nasionál, kuarta (15/8).

Purtantu, ohin, Prezidente Parlamentu Nasionál ne’e mós husu ba deputadu sira ne’ebé resesu marka prezensa iha 30 agostu, tanba iha bainaka espesiál halo diskursu iha Parlamentu Nasionál.

Tanba ne’e, Arão Noé, fó orientasaun ba funsionáriu Parlamentu Nasionál nian, atu halo preparasaun ne’ebé di’ak iha plenária Parlamentu nian.

“Livru deputadu sira nian tenke muda sai provizóriu, nune’e tékniku sira bele halo preparasaun”, tenik nia ba deputadu sira hafoin prezide eleisaun ba kompoziaun meza Komisaun Permanente.

Jornalista: Evaristo Soares Martins

Diretór: Xisto Freitas

HAKEREK NO HATÁN

Please enter your comment!
Please enter your name here