Espoza Prezidente Repúblika, Cidália Nobre Mouzinho Guterres. Imajen Mídia PR

DILI, 14 Agostu 2019 (TATOLI)—Espoza Prezidente Repúblika (PR), Cidália Nobre Mouzinho Guterres preokupa ho númeru violénsia hasoru labarik kontinua aas iha Timor-Leste.

Cidália espresa preokupasaun ne’e durante intervensaun iha seremónia lansamentu relatóriu ho títulu The Unseen,  Unsafe : Underivestment in Ending Violence Against Children in the Pacific and Timor-Leste, iha Hotel Timor, Colmera,  kuarta ne’e.

Relatóriu ne’e sai preokupasaun espoza PR tanba relata katak violénsia hasoru labarik “Exesionalmente” aas iha TL.

Iha Timor-Leste, haktuir hosi relatóriu ne’e katak  deskonsertante labarik pursentu 87 ka labarik liu 612,000 sofre violénsia fíziku ka emosionál iha uma.

Ho realidade ne’e, espoza PR husu ona ba Prezidente Repúblika, Francisco Guterres Lú Olo katak durante mandatu sei la fó Indultu ba Prizioneiru sira ne’ebé tama kadeia tanba halo violasaun hasoru labarik.

Cidália hateten, Prezidente Repúblika rasik tau atensaun maka’as ba kestaun ne’e, katak prizioneiru ne’ebé tama kadeia tanba halo violénsia hasoru labarik, sei la hetan Indultu.

Nia konta tuir katak aleinde hanesan Prezidente Repúblika, Lú Olo hanesan mós aman, sente katak violasaun hasoru labarik, konsidera hanesan laiha morál.

Tanba ne’e maka iha tinan kotuk, bainhira Xefe Estadu simu lista hosi prizaun ne’ebé husu Indultu, maioria kazu abuzu seksuál ba labarik, maibé PR haruka fila  tanba kontra konsiénsia.

Cidália mós promete katak ninia gabinete sei halo sosializasaun ba komunidade liliu ba  estudante sira, atu hatene kona-ba papél família, obrigasaun nu’udar estudante, nune’e tulun hodi redúz kazu ne’ebé sai preokupasaun ema hotu nian iha ohin loron.

Tuir Cidália katak atu asegura direitu labarik no hapara violénsia hasoru labarik iha TL, la’ós estadu no parseiru sira mesak, maibé parte hotu tenke iha konsiénsia atu hanoin katak labarik seluk hanesan mós “ha’u” nia oan.  “Tenke hateke ema seluk nia oan hanesan ita-nia oan rasik”,  nia afirma.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here