Segundu Komandante PNTL Ainaro, Asistente Superintendente, Albino Mozinho. Imajen/Eugénio Pereira

AINARO, 14 agostu 2019 (TATOLI)-Komandu Polisia Nasionál Timor-Leste (PNTL), Munisípiu Ainaro koordena ho Komandu FALINTIL-Forsa Defeza Timor-Leste (F-FDTL) no autoridade suku hodi  garantia seguransa ba selebrasaun loron konsulta populár ba dala-20 iha Ainaro la’o ho dame.

Notísia Relevante : Povu Ainaro Selebra Loron Referendu ho Misa Agradesimentu ba Eroi Sira

Segundu Komandante PNTL Ainaro, Asistente Superintendente, Albino Mozinho dehan, hahú kedas iha loron 1 agostu too agora PNTL no F-FDTL koordena malu ona hodi fó seguransa ba atividade hotu- hotu ne’ebé realiza iha Ainaro too postu no suku hotu.

“Komandu PNTL Ainaro iha ona planu servisu ne’ebé feitu ho nia tarefa servisu fahe ba eskuadra no seksaun sira liu-liu operasaun ativu koopera ho autoridade suku no juventude sira hodi garantia seguransa,” dehan Superintendente Albino Mozinho, ohin, ba jornalista iha Munisípiu Ainaro.

Notísia Relevante : Ainaro Realiza Kompetisaun Sertame Liga ba Istória TL

Nia dehan, atividade hotu-hotu ne’ebé komisaun organizadora nasionál too munisípiu hala’o hosi loron too kalan, PNTL mantein no la iha problema ruma maka akontese.

Alende ida ne’e, Ofisiál Polisia Suku (OPS) na’in 21 no Konsellu Polisiamentu Komunitária (KPK) koordena ho autoridade asegura selebrasaun eventu hotu-hotu la’o ho ambiente hakmatek.

Iha parte seluk, Albino hatutan, durante fulan Janeiru too Agostu PNTL Ainaro la dun rejistu kazu krime ho númeru boot, tanba kuaze problema sira ne’ebé akontese parte PNTL koordena buka rezolve kedas.

“Ha’u bele dehan kazu ne’ebé PNTL rejista ho númeru 25 ne’e kategoria ki’ik,” hateten Albino hodi mensiona mós katak, ba kazu balun ne’ebé tama kategoria ba krime públiku no semi públiku prosesa ba Ministériu Públiku hodi aprezenta ba Tribunál Munisípiu Covalima.

Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here