Ministru Obras Públikas Salvador Soares dos Reis Pires, Imajen/Egas Cristovão

DILI, 14 agostu 2019 (TATOLI)- Ministru Obra Públika (MOP), Salvador Eugénio Soares dos Reis Pires, , alerta ba ema hotu atu labele estraga lampu iha fatin públiku.

“Ita husu ba populasaun tomak liuliu iha kapitál Dili, bainhira atu halo vizita ba fatin turístika sira presiza kuidadu no labele estraga lampu ka street lights ne’ebé monta iha fatin públiku liuliu iha jardín sira ne’ebé hetan ona manutensaun” Ministru Salvador ba Ajénsia Tatoli hafoin enkontru ho kargu xefia MOP, Kaikoli, ohin.

Hodi hatutan Diresaun Jerál Eletrisidade Timor-Leste (EDTL) halo ona manutensaun ba lampu sira iha estrada ninin ka iha fatin públiku, inklui jardín sira iha Dili laran, enkuantu prosesu manutensaun atinje ona porsentu 90 no sei fó naroman ba movimentasaun komunidade nian iha tempu kalan.

Manutensaun ba liña elétrika kobre hosi estrada Fatukama (Hosi estátua Kristu Rei) to’o ponte BJ Habibie, kontinua to’o estátua Amu Papa João Paulo II inklui ahi iha jardín laran, enkuantu pakote servisu iluminasaun lampu iha estrada, hahú hosi Palásiu Governu to’o Nobre.

Orientasaun ministru nian atu asegura enerjia elétrika hodi lakan normál iha ámbitu komemorasaun loron Konsulta Popular ba dala 20( 30 agostu 1999- 30 agostu 2019) no Misaun INTERFET (Forsa Internasionál iha Timor Leste).

Jornalista: Florencio Miranda Ximenes

Editora    : Maria Auxiliadora

HAKEREK NO HATÁN

Please enter your comment!
Please enter your name here