ISC

DILI, 13 agostu 2019 (TATOLI)—Reitór Institutu Cristal, ohin, informa maske to’o agora Ministériu Ensinu Superior Siênsia no Kultura (MESSK) seidauk foti desizaun hodi fó lisensa ba Institutu Superior Cristal (ISC) atu loke Institutu ida iha Aileu maibé nia fó orientasaun loke ona ISC iha Aileu depois mak hein avaliasaun husi governu.

“Ami komprende tebes. Loloos ne’e ami tenke hein autorizasaun husi Ministeriu maibé ami-nia proposta hatama kle´ur tiha ona to’o agora seidauk hetan lisensa husi governu. Entaun, ha’u ninia inisiativa rasik loke tiha depois mak sira mai halo avaliasaun ka asesment,” dehan Reitór  ISC, Sebastião Pereira, ba Ajénsia TATOLI iha nia knaar fatin, Balide, Dili, Segunda (13/8/2019).

Tuir lei, nia hatutan, loloos ne’e kuandu governu simu ona proposta husi instituisaun ida atu loke ninia Institutu Ensinu Superiór antes fulan neen, ekipa avaliasaun husi Ministeriu tenke tun ona ba halo avaliasaun. Maibé, fulan neen liu ona laiha reposta.

“Ami hanesan koko de’it simu estudante foun no prepara daudaun ona ninia fasilidade inklui rekursu umanu liuliu dosente sira no mós orsamentu oituan atu preve hodi dudu ezisténsia Institutu ne’e ba futuru,” tenik nia.

Tuir nia, maske kondisaun ISC ne’e seidauk kompleta hotu tanba foin mak hadi’a hela maibé ISC hakarak kumpri regra ka padraun ne’ebé mak governu kria ona tuir estandarizasaun ne’ebé iha atu nune’e bele hetan akreditasaun husi governu.

Institutu Siénsia Cristal, nia informa, iha ninia mehi bo’ot hakarak ajuda governu atu apoiu dezenvolvimentu nasaun ida ne’e liuhusi área ensinu superiór atu nune’e bele lori setór edukasaun besik liután ba povu.

Maibé tanba laiha lisensa, reitór ne’e haktuir, governu liuhusi MESSK hakarak taka tiha maibé ISC iha proposta ne’ebé hatama ona iha minstériu tanba ISC iha baze fundamentál ho ninia produtu ne’ebé mak ISC prodús iha Aileu kuaze ema 500 resin ona.

Nia hatutan tan katak ISC iha Aileu ne’e la’ós klase paralelu maibé Instistutu ida ketak ne’ebé uza nafatin bandeira ISC nian tanba ne’e mak hanarak ISC Polu Aileu.

“Purtantu ninia fakuldade sira ne’e tenke tuir Fakuldade iha kampus sentrál ne’ebé  hetan ona akreditrasaun husi governu. Agora, MESSK ho ninia kompeténsia tomak bazeia ba lei ka padraun ne’ebé iha deside taka ne’e mós la duun di’ak. Tanba, instituisaun sira ne’e hamriik atu fó apoiu ba serbisu governu nian liuliu ministériu ne’ebé mak tutela,” nia esplika.

Notísia relevante:Reitor ISC Husu Ba MESSK Hato’o Koñesementu Antes Hala’o Fiskalizasaun

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here