Ministru Ensinu Superiór, Siénsia no Kultura, Longuinhos dos Santos. Imajen: TATOLI

DILI, 14 agostu 2019 (TATOLI)—Ministru Ensinu Superiór, Siénsia no Kultura (MESKK), Longuinhos dos Santos, aprezenta programa prioridade no orsamentu 2020 nian ba Primeiru-Ministru (PM), Taur Matan Ruak.

“Ohin ha’u halo diskusaun ho Primeiru-Ministru kona-ba programa prioridade no mós orsamentu ba 2020 nian. Ami informa ba Primeiru-Ministru, katak ministériu iha programa neen (6)”, Longuinhos dos Santos, ba Agência TATOLI, iha Palásiu Governu, kuarta ne’e.

Nia dehan, programa ministériu nian ba 2020 mak hanesan infraestrutura, implementasaun polítika ensinu superiór, implementasaun padraun mínimu, reforsa kondisaun funsionamentu ba Institutu Politéknika Betano, reforsa kondisaun ba iha Instititu Nasionál Siénsia no Teknolojia, kontrolu no jestaun ba bolsu estudu nian.

“Ida ne’e mak prioridade hosi ministériu ne’e nian. Resposta Primeiru-Ministru apoia %100 ba programa hirak ne’e no ita tau orsamentu depois sei tama iha Komisaun Revizaun Orsamentu, sei aprezenta ba Parlamentu iha 15 outubru. Ha’u labele fó-sai lai montante orsamentu hira mak ami tau ba programa hirak ne’ebé iha leten”, dehan Ministru Longuinhos.

Nia haktuir, rezultadu ezekusaun orsamentu 2019 nian la’o di’ak, tanba iha 2019 laiha orsamentu ba infraestrutura—iha de’it mak polítika nasionál ensinu superiór nian. Governante ne’e haktuir, kona-ba programa 2020 nian trasa to’o 2023.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here