DILI, 14 agostu 2019 (TATOLI)-Ministru Defeza no Ministru Seguransa ein-funsaun, Filomeno Paixão de Jesus, husu ba FALINTIL-Forsa Defeza Timor-Leste (F-FDTL, sigla portugés) atu kuida oferta lojístika ne’ebé, ohin, oferese hosi Repúblika Populár Xina ba F-FDTL.
Notísia Relevante : Repúblika Populár Xina Entrega Ekipamentu Militár Ba Governu TL
oferese hosi Xina ba F-FDTL. Imajen/António Gonçalves
Ekipamentu sira ne’ebé Repúblika Populár Xina entrega ba F-FDTL ne’e, kompostu hosi karreta hitu (7), botas 3.600, mala 3.600, kama 3.600, armáriu 180 ho tenda militár nian 80.
Oferta ne’e entrega diretamente hosi Embaixadór Repúblika Xina mai Timor-Leste, Xiao Jiangou ba Ministru Defeza, Filomeno Paixão de Jesus, ne’ebé asiste mós hosi Xefe Estadu Maiór Jenerál F-FDTL, Majór Jenerál Lere Anan Timur ho nia estrutura F-FDTL, Komandante Jerál Polisia Nasionál Timor-Leste (PNTL), Komisáriu Faustino da Costa, ho mós funsionáriu ministériu relevante.
“Maizumenus apoiu ida ne’e ha’u haree avaliadu mínimu milloens tolu dolar amerikanu, maibé ko’alia kona ba komersiál bele to’o milloens lima dolar Amerikanu,” hateten Ministru Filomeno Paixão de Jesus, ba ajénsia TATOLI.
Nia lia tun dehan, “ita-nia estadu enfrenta problema barak, ne’ebé la’ós haree de’it ba Forsa no Polisia nian, maibé ita haree mós ba povu nia susar hanesan edukasaun, agrikultura, nune’e mós halo uma ba populasaun sira, entaun simu ida ne’e ho sorte boot no sente hanesan monu hosi Lalehan mai, entaun ho ida ne’e ita tenke responsabiliza didi’ak,” afirma Ministru Filomeno Paixão.
Nia mós apela ba komandu F-FDTL katak iha buat ruma (sasán) hirak ne’e mak estraga ou hanoin aat tenke halo responsabilizasaun ba iha militar sira katak halo prosesu obrigasaun halo didi’ak, katak, kuandu sira sala tenke foti prosesu disiplinár depois bele iha responsabilidade sivíl ba sasán hirak ne’e.
Biban ne’e Majór Jenerál Lere Anan Timur iha nia diskursu afirma kontinuasaun kooperasaun instituisaun forsa rai rua (Xina ho TL) no kontinua mantein komunikasaun atu oinsá mak forsa Xina ne’ebé ho koñesimentu aas bele tulun fó formasaun ba F-FDTL.
“Ha’u fiar katak Repúblika Popular Xina sei prepara ha’u nia militar ne’ebé mak iha kualidade ho nivel ne’ebé mak aas no profisionál,” tenik Lere Anan Timur.
Jornalista : Osória A. Marques
Editór : Francisco Simões
