Ministru Obra Públika, Salvador Eugénio Soares dos Reis Pires. Imajen Tatoli/Egas Cristóvão

DILI, agostu 2019, (TATOLI)- Manutensaun ba liña elétrika la’o ona iha Dili laran, hahú kobre hosi estrada Fatukama to’o ponte BJ Habibie, kontinua to’o estátua Amu Papa João Paulo II inklui ahi iha jardín laran, enkuantu pakote servisu iluminasaun lampu iha estrada, hahú hosi Palásiu Governu to’o Nobre.

“Ida ne’e hanesan pasu primeiru ba manutensaun lampu hirak iha estrada ninin, tanba ne’e EDTL kontinua orsamenta tinan-tinan ba item manutensaun, nune’e iha estragu ruma bele troka no kontinua mantén lampu ne’ebé mak di’ak hodi fó naroman ba ita iha kalan” Ministru MOP, Salvador Soares dos Reis ba jornalista sira iha Palásiu Governu hafoin reuniaun Konsellu Ministru, ohin.

Hodi hatutan katak Diresaun Jerál Eletrisidade Timor-Leste (EDTL) planeia ona atu halo manutensaun kada tinan ba lampu elétriku iha Dili laran, nune’e bele hamenus poténsia krime, fó seguransa ba sidadaun liuliu ba feto no labarik sira, ema vulneravel sira atu nune’e bele dehan sai sidade ida ne’ebé seguru.

Governante ne’e esplika atividade manutensaun ba lampu iha sidade Dili, liuhosi prosesu aprovizionamentu, kuandu kustu menus hosi $100, bazeia ba kotasaun, se liu ida ne’e tenke halo anunsia ba públiku atu kompañia sira hatama presu kotasaun depois maka hili vensedór ba obra ne’e, ida ne’e hola parte iha planu 2019.

Jornalista: Antónia Gusmão

Editora    : Maria Auxiliadora

HAKEREK NO HATÁN

Please enter your comment!
Please enter your name here