Xefe Estadu Maiór Forsa Defeza Timor-Leste (F-FDTL) Majór Jenerál Lere Anan Timur. Imajen/TATOLI.

DILI, 14 agostu 2019 (TATOLI)-Xefe Estadu Maiór Forsa Defeza Timor-Leste (F-FDTL) Majór Jenerál Lere Anan Timur, konvida Autoridade Nasionál Petróleu no Minerál (ANPM) atu aprezenta istória tasi Timór no negosiasaun Fronteira Marítima (FM) entre Timor-Leste no Austrália ba ofisiál sira F-FDTL nian.

“Ami mak konvida ANPM tanba ha’u lakohi ofisiál F-FDTL sira hanesan sim ba instrumentu porque ami-nia ofisiál sira ne’e intelektuál no formadu ne’ebé sira tenke hatene prosesu fronteira marítima ne’ebé ita hala’o daudauk ona”, Majór Jenerál Lere afirma hafoin aprezentasaun ANPM iha Kuartél F-FDTL, Fatuhada, ohin.

Tuir Lere, ANPM nia aprezentasaun klaru tebes no estratéjiku liu, ne’ebé presiza duni membru F-FDTL sira atu hatene lala’ok fronteira marítima no kontratu ne’ebé la’o hela iha tasi Timór.

“Ha’u hanoin katak ita-nia na’i-ulun sira hatene atu trata asuntu ekonomia ne’e presiza mós seguransa para bele garante ita-nia dezenvolvimentu ekonomia rai-laran bele la’o”, katak.

Tanba ne’e nia afirma, F-FDTL liuliu komponente Navál la’ós prepara liu, maibé bele halo seguransa ba fronteira tasi bainhira Governu kria kondisaun.

Prezidente Autoridade Nasionál Petróleu no Minerál, Gualdino da Silva. Imajen/TATOLI.

Iha fatin hanesan, Prezidente Autoridade Nasionál Petróleu no Minerál, Gualdino do Carmo, sente onradu no agradese ba konvite husi Majór Jenerál Lere Anan Timur atu mai aprezenta istória tasi Timór no negosiasaun FM entre Timor-Leste ho Austrália.

“Ita presiza duni seguransa ba rekursu petróleu no minerál nian iha tasi-laran no rai-maran ne’ebé ligadu ho autoridade seguransa nian”, katak.

Tanba ne’e nia dehan, seguransa no defeza ne’e importante tebes atu hatene informasaun lala’ok FM no kontratu sira atu apoiu bainhira insidente ruma akontese no presiza atuasaun.

Iha aprezentasaun ne’e, ANPM fahe informasaun ba istória negosiasaun FM entre Timor-Leste ho Austrália no kontratu sira ne’ebé la’o daudaun iha tasi Timór.

Aléinde ne’e, Gualdino afirma benefísiu husi lei haat ne’ebé parlamentu Nasionál aprova ona no daudaun ne’e sei iha gabinete Prezidente Repúblika hanesan proposta lei númeru 4/V-segunda alterasaun númeru 13/2005, 2 setembru kona-ba Lei Atividade Petrolífera, segunda alterasaun Lei númeru  9/2005, 3 agostu kona-ba Lei Fundu Petrolíferu, primeira alterasaun Lei númeru 8/2008, 30 juñu (Lei Tributária), primeira alterasaun Lei númeru 3/2003, 1 jullu kona-ba Tributasaun Kontratante iha Bayu Undan, primeira alterasaun Lei númeru 4/2003, 1 jullu kona-ba Dezenvolvimentu Petróleu iha Tasi Timór (Estabilidade Tributária).

No mós proposta lei númeru 7/V-Rejime Laborál no Migratóriu ba iha Projetu Bayu Undan.

Partisipa iha serimónia ne’e, Vise Xefe Estadu Maiór F-FDTL, Brigadeiru  Jenerál Falur Rate Laek inklui Koronél no ofisiál sira Falintil-Forsa Defeza Timor-Leste.

Jornalista: Florencio Miranda Ximenes  

 Editora : Maria Auxiliadora

HAKEREK NO HATÁN

Please enter your comment!
Please enter your name here