Ofisiais PNTL, Imajen/Antonio Goncalves

DILI, 14 agostu 2019 (TATOLI)-Komandante Jerál Polisia Nasionál Timor-Leste (PNTL) Komisáriu, Faustino da Costa, hateten, formasaun ba membru PNTL  importante hodi hasa’e abilidade  no koñesimentu hodi asume  kna’ar “Mantein Lei Ho Orden” ho responsabilidade.

Notísia Relevante : Membru PNTL Tuir Formasaun ‘Protesaun Direitu Umanu’

Komandante Jerál PNTL, Komisáriu Faustino da Costa. Imajen/António Gonçalves

Komisáriu Faustino da Costa, hateten lia hirak ne’e bainhira halo lansamentu ba programa formasaun OST (Officer Safety Training) ba membru polisia sira hosi Munisípiu 12, inklui Rejiaun Administrativu Espesiál Oe-Cusse Ambeno (RAEOA), Kuarta (14/08/2019).

“Ha’u hanoin ho formasaun ne’e bele kontribui liu tan oinsá mak membru sira uza forsa ba atuasaun problema ruma bainhira  mosu iha terrenu,” afirma Komisáriu Faustino da Costa.

Nia tatoli ba formandu sira atu aproveita formasaun ne’e ho di’ak liután hodi serbí Estadu no nasaun. Nune’e, nia afirma tan, membru sira  ne’ebé la pasa iha formasaun ne’e sei proibidu atu kaer kilat hodi tuir fila fali formasaun iha etapa tuir mai.

“Ba oin komandu PNTL sei kria regra ne’ebé rigorozu nune’e labele utiliza arma forsa nian arbiru. Tanba ne’e sei halo teste fila-fali ba membru sira  mak la aprovadu sei la lori arma,” Komisáriu Faustino hateten.

Iha fatin hanesan, Komandante Akademia PNTL,  Superintendente Aquinino Ramos, hatete, komandu sei atribui sertifikadu ba formandu  sira ne’ebé maka aprovadu iha formasaun ne’e.

“Kursu ne’e sei hala’o durante loron   ho sesaun teoria, pratika no ikus  sei iha teste,” informa Aquinino Ramos.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here