Igreja Katólika kontinua apela oinsá sosiedade Timor-Leste atu kuidadu no labele soe bebé. Meius sosializasaun Igreja nian ne'e monta espanduk iha edifísiu Komisaun Justisa no Pás, Igreja Katedrál Dili. Imajen/Eugénio Pereira

DILI, 14 agostu 2019 (TATOLI)-Mundu globalizasaun, ohin loron, lori obstákulu no dezafiu oioin ba vida espirituál no vida fízika ema umana nian. Tanba ne’e, família, liu-liu  aman-inan sira  tenke akompaña oan sira atu la bele monu ba tentasaun ne’ebé bele periódika oan sira nia futuru no família nia integridade.

Notísia Relevante : Igreja Kondena Inan Deskoñesidu Soe Bebé

Ho fenómena sosiál ikus-ikus ne’e iha Timor-Leste, liu-liu relasiona ho kazu abortu no soe bebé, Padre Agostinho Soares, SDB, husu aman-inan sira nia kontribuisaun ativa hodi akompaña oan sira nia vida moris espirituál no fízika.

Diretór OIPAS (Observatrio da Igreja Para Assuntos Sociais) ne’e afirma katak, ohin loron iha mundu globalizasaun dezafiu barak ne’ebé mak ataka vida espirituál no fíziku ninian, nune’e dala-ua’in joven sira la kontrola aan, ikus mai monu ba tentasaun oi-oin to’o moris hamutuk sub-subar  nu’udar fen-la’en.

“Ha’u hanoin aman-inan sira presiza akompaña oan sira atu hatene valor moral no respeita ninia isin,” hateten Pe. Agostinho Soares, SDB, ohin, hodi responde Ajénsia TATOLI, iha nia knaar fatin, Dom Bosco, Comoro, Dili.

Dosente Institutu Superior de Filozofia e Teolojia (ISTIF-sigla portugés) ne’e afirma tan, aman-inan mós tenke hatene no akompaña progresu fíziku liuliu joven sira ne’ebé mak iha ona idade 17, 18 no 19. Tamba, tempu krize nian liuliu ba sira hodi bele koñese sira aan,.

“Se la koñese aan didi’ak ikus mai monu ba iha ransu livre (pergaulan bebas) hodi rezulta tentasaun oioin hanesan soe bebé no sai ‘drogadu’,” tenik Padre Agostinho.

Nia mós apela ba iha oan sira, liuliu joven sira ne’ebé mak mai hosi munisípiu tenke pasiénsia hodi hela hamutuk ho família hodi aprende buat barak, se moris ketak karik tenke disiplina aan iha moris no orsamentu rasik. Tanba, realidade moris iha Dili la’ós fasil no buat hot-hotu ho osan, se osan laiha husu iha se, hodi selu eskola no sosa hahán hodi han hemu.

“Ha’u mós hanoin organizasaun hanesan igreja, sosiedade sivíl no eskola ninia knaar hodi fó informasaun, maibé responsabilidade hosi uma laran nian mak família,” afirma Padre Agostinho.

Jornalista : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here