Primeiru-Ministru, Taur Matan Ruak (Karuk )Enkontro Kortezia ho Entrega Souvenir ba Xefe Estadu Maior General Forsas Armadas hosi Portugal, Almirante António Silva Ribeiro (Loos). iha Palásiu do Governu. iha Palásiu Governu, Tersa, (13/08/2019). Imajen/TATOLI

DILI, 13 agostu 2019 (TATOLI) – Primeiru-Ministru (PM), Taur Matan Ruak, simu vizita kortezia husi Xefe Estadu Maiór Jenerál Forsa Armada Portugal, Almirante António Silva Ribeiro, hodi ko’alia kona-ba kooperasaun entre Forsa Armada Timor-Leste no Portugal.

“Ha’u ho satisfasaun mai komprimenta Jenerál Taur Matan Ruak. Iha kazu konkretu ko’alia kona-ba kooperasaun entre militár Forsa Armada portugueza no FALINTIL-Forsa Defeza Timor-Leste (F-FDTL)”, tenik Almirante António Silva Ribeiro ba jornalista sira iha Palásiu Governu, tersa ne’e.

Xefe Estadu Maior General Forsas Armadas hosi Portugal, Almirante António Silva Ribeiro. Imajen/TATOLI

Nia dehan, iha biban ida ne’e, nia ho Xefe Governu iha oportunidade hodi ko’alia kona-ba oportunidade atu iha fali kooperasaun entre Forsa Armada Timor-Leste no Portugal iha operasaun dame Organizasaun Nasaun Unida (ONU), hanesan saida mak akontese ona iha Libanon ho susesu.

Tuir Almirante portugués ne’e, kestaun ne’e sei trata ho kuadru ne’ebé hola parte hanesan nia nível, hanesan Xefe Estadu Maiór F-FDTL, Majór Jenerál Lere Anan Timur, nomós nível Ministru Defeza portugués ho ninia omólogu.

“Loron 29 agostu, Ministru Defeza Nasionál, João Gomes Cravinho sei to’o Timor-Leste, tanba buat hirak ne’e tenke servisu iha nível polítiku nomós nível militár”, nia informa.

Nia haktuir, nia ho PM mós ko’alia kona-ba posibilidade atu kria Koléjiu Militár ba formasaun joven, ne’ebé hanesan eziste ona iha Portugal.

Nune’e mós nia dehan, aborda oituan kona-ba seguransa marítima ne’ebé hanesan prioridade iha Timor-Leste, analiza posibilidade atu hametin kooperasaun ne’ebé iha ona entre Forsa Armada nasaun rua.

“Ami mós ko’alia oituan kona-ba pasadu, relasaun nasaun rua durante tinan barak”, nia dehan tan.

Jornalista: Evaristo Soares Martins

 Editór: Xisto Freitas

HAKEREK NO HATÁN

Please enter your comment!
Please enter your name here