Ezemplu eko turizmu ne'ebé dezenvolve hosi SEPFOPE.

DILI, 14 agostu 2019 (TATOLI)-Pro-Reitór Asuntu Estudantil, Universidade Nasionál Timor-Lorosa´e (UNTL), Zeferino Viegas hateten, Akademia Hadomi Natureza (AKAHANA) agora daudaun hahú ona promove turizmu komunitária kona-ba fatin istóriku luta saudozu sira nian hodi liberta rai ida ne’e.

Dadus kona-ba poténsia turizmu natureza, oras ne’e daudaun AKAHANA aprezenta ona ba universidade atu uza nu´udar matéria referénsia ida atu bele ajuda planu Ministériu Turizmu nian ba futuru.

Maibé, pro-reitór UNTL ne’e dehan AKAHANA ninia planu ba futuru ne’e mak atu halibur dadus detalladu liután kona-ba fatin istóriku sira ne’ebe mak uluk aswa´in luta na´in sira utuliza nu´udar baze apoiu hodi halo konsentrasaun.

“Ita hatene ona fatin istóriku saudozu Nino Conis Santana, Nicoluo Lobato no sira seluk nian maibé ita seidauk hatene kle´an liu tanba saida mak ita-nia luta na´in sira hili sai nu´udar baze apoiu ba sira,” tenik Pró-reitór Zeferino Tilman ba ajénsia TATOLI iha ninia Gabinete Fakuldade Agrikultura, Kampus Sentrál, UNTL, kuarta (14/08/2019).

Akadémiku ne´e hatutan katak inisiativa atu prezerva turizmu komunitária ne’e mai husi estudante sira ho naran Estudante Hadomi Natureza (ESHANA) maibé tanba intervensaun atu fortifika atividade ne’e mak universidade rasik forma fali AKAHANA atu reforsa ESHANA nia planu sira ne’e.

“Portantu, agora daudaun planu sira ne’e asegura dadaun ona hodi hein apoiu universidade nian atu bele alkansa objetivu hodi prezerva fatin turístiku sira atu sai potensialidade ba futuru,” nia konklui.

Notísia relevante: AKAHANA Husu Timoroan Sira Prezerva Natureza

Jornalista : Tome Amado

Editór       : Rafy Belo

HAKEREK NO HATÁN

Please enter your comment!
Please enter your name here