Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

DILI, 14 agostu 2019 (TATOLI)—Ministru Defeza, Filomeno Paixão de Jesus, aprezenta relatóriu vizita Rússia no Londres, Inglaterra, ba Primeiru-Ministru (PM), Taur Matan Ruak.

“Primeiru-Ministru mak haruka ha’u ba Rússia no Londres, tan ne’e ohin ha’u aprezenta relatóriu. Ba iha Rússia, sira bolu ita haree jogu komunitária (ezersísiu militár). Sira halo demontrasaun ho infantaria, tanque de guerra, sira bolu ita ba para asisti”, dehan nia hafoin hasoru malu ho Xefe Governu, iha Palásiu Governu, kuarta ne’e.

Nia dehan, Timor-Leste halo kooperasaun di’ak ho rai hotu-hotu iha mundu. “Ita laiha problema ho rai seluk. Ita di’ak ho rai hotu-hotu. Sira ne’ebé bolu ita atu halo kooperasaun, ita simu, hanesan ita halo kooperasaun ho Xina, Amérika, Austrália, Portugál no Nova Zelândia, Xina hakarak ita prontu, Índia hakarak ita prontu, Pakistaun hakarak, ita prontu”, nia katak.

Filomeno hatutan, oras ne’e, Rússia nia embaixadór iha Jakarta. “Sira sei mai hasoru ita. Ita túr ko’alia, ita sei haree to’ok, kooperasaun militár ka asisténsia militár, treina ita-nia rekursu umanu ka ajuda ita-nia ekipamentu báziku ruma”, subliña.

Governante ne’e esplika, vizita ba Rússia ne’e la’ós ba husu misil ka aviaun funu, ba husu de’it ida han-hemu ba forsa nian ne’e hanesan lojístika de’it no kilat ki’ik.

Ministru Defeza vizita Londres, Inglaterra, haree fatin treinu, vizita mós serbisu intelijénsia rai refere nian, patrollamentu aérea, fotografia aérea no vijilánsia”, Filomeno haklaken.

Purtantu, nia haktuir, Primeiru-Ministru, Taur Matan Ruak, prontu simu apoia rai hotu-hotu ba Timor-Leste liuhosi kooperasaun iha área defeza nian.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here