Sekretáriu Estadu Kooperativa hala’o kolleita ba Sharghum ka batar ain naruk iha Munisípiu Baukau ,Postu Administrativu Venilale.

Baukau, 13 agostu 2019 (TATOLI) – Sekretáriu Estadu Kooperativa (SEKoop), Arsénio Pereira, ohin hamutuk ho movimentu kamponeza Timor-Leste no povu agrikultura halo kolleita Shorghum ka batar ain naruk iha Suku Uai-Laha, Postu Administrativu Venilale.

“Ita hakarak halo mudansa ba moris liuhosi ita nian atividade ba produtu sira ne’ebé Ita prodús” afirma Arsénio Pereira bainhira hato’o intervensaun iha kolleita Sharghum ho ektare ida iha Suku Uai-Laha.

Hafoin kolleita, Arsénio Pereira apresia ba esforsu ne’ebé movimentu kamponeza hamutuk ho komunidade agrikultura halo hodi prodús produtu sira.

Atividade kolleita ne’e hanesan esforsu Governu nian liuhosi SEKoop atu aumenta produsaun rai laran liuhosi kooperativa no hakarak halo mudansa ba moris.

Tanba ne’e, Arsénio Pereira dezafia ba movimentu kamponeza no agrikultór sira atu koopera malu hodi kria profisaun integradu, nune’e bele envolve joven sira hodi haforsa ekonomia Timor-Leste no aumenta kresimentu ekonomia iha rai laran.

Iha fatin hanesan, Koordenadór Movimentu Kamponeza Timor-Leste, Mario Ceffin, kompromete sei esforsu hamutuk ho agrikultór sira hodi kria atividade sira hodi bele benefisia ba povu Venilale.

Nia mós promete katak sei esforsu hodi envolve joven sira hodi aprende kooperativa liuhosi produsaun, nune’e bele garantia sustentabilidade produsaun.

Nune’e mós, Xefe Suku, Uai-Laha, Rafael Guterres, apresia tebes ba esforsu ne’ebé grupu kamponeza halo hodi tulun toos nain hodi prodús batar ain naruk.

Jornalista : Natalino Costa

Editora     : Maria Auxiliadora

 

HAKEREK NO HATÁN

Please enter your comment!
Please enter your name here