Embaixadór Timor-Leste (TL) foun ba Brazíl, Olímpio Branco

DILI, 13 agostu 2019 (TATOLI)—Embaixadór Timor-Leste (TL) foun ba Brazíl, Olímpio Branco, promete katak durante mandatu nia sei lori empreza privada sira hosi Brazíl mai investe iha TL.

Promesa ne’e Olímpio hato’o hafoin simu pose hosi Prezidente-Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, tersa ne’e.

Nia orgullu boot tanba hetan konfiansa hosi Estadu no Governu hodi sai embaixadór ba dala tolu ona hanesan antes ne’e iha Repúblika Populár Xina, tuir mai iha Repúblika Kuba no oras ne’e ba Brazíl.

Olímpio Sei kaer metin buat hotu ne’ebé definidu iha planu estratéjiku no Planu Nasionál Dezenvolvimentu Governu nian,  hanesan baze no gia atu buka apoiu hosi Brazíl.

Durante iha Brazíl, Olímpio sei hametin tan kooperasaun ne’ebé iha ona iha área edukasaun, ho área sira seluk inklui área judisiál.

Liu-tan ida ne’e,  nia sei buka oinsá atu lori empreza privada sira mai investe sira-nia osan rasik iha Timor-Leste.

Nia hatutan, iha ona empreza lubuk ida mak manifesta ona sira-nia interese atu halo investimentu iha área konstrusaun, área fábrika, materiál konstrusaun, agrikultura, peska, turizmu no seluk-tan.

Nia subliña katak área turizmu hanesan pilár importante ba dezenvolvimentu ekonómiku TL, ne’e duni tenke haburas otél sira, restaurante, resorts, ida ne’e presiza investimentu diretu hosi rai li’ur.

Kona-ba difikuldade, Olímpio hateten, nu’udar embaixadór tenke hatene kona-ba negosiasaun, atu aprezenta programa prioridade no planu ne’ebé prioridade atu halo dezenvolvimentu.

Entretantu,  liuhusi Dekretu Prezidente Repúblika númeru 36/2019, 37/2019 no 38/2019,  dekreta hodi nomea Olímpio Branco nu’udar Embaixadór ba Brazíl, hodi troka Embaixadór Gregório de Sousa. Olímpio Branco, nu’udar funsionáriu Ministériu Negósiu Estranjeiru ho karreira diplomata.

Olimpio Branco hasai kursu Tékniku Agrikultura iha Instituto Agrário de Chimoio, iha Moçambique no konklui estudu universitáriu iha área Relasaun Internasionál no Diplomasia iha Moçambique. Hosi dezembru 2002 to’o setembru 2005 indijitadu nu’udar Vise Ministru Negósiu Estranjeiru no Kooperasaun Timor-Leste.

Iha tinan 2005-2010 nu’udar Embaixadór Timor-Leste ba Repúblika Popuár Xina. Hosi tinan 2012-2016 nu’udar Embaixadór Timor-Leste ba Repúblika Kuba. Tuir planu, mandatu Olímpio iha Brazíl másimu sei hala’o durante tinan lima, tuir polítika Governu nian.

Jornalista: Cipriano Colo

Editór:  Xisto Freitas

HAKEREK NO HATÁN

Please enter your comment!
Please enter your name here