Estudante primária sira entuziasmu dezenvolve atividade ho estudante DLP. Foto: DLP

DILI, 13 agostu 2019 (TATOLI)-Diretór Jerál Pre-Eskolár Ensinu Báziku Rekorente, Cidalio Leite klarifika, dadus ne’ebé CARE Internasionál fó sai katak labarik 79% iha munisípiu haat hanesan Ainaro, Ermera, Liquiça no Manatuto, la hatene lee ne’e laloos. Maibé, dadus loloos mak labarik 92% husi labarik rihun rua mak hatene lee letra 21 husi letra 100.

Diretór Cidalio Leite konsidera katak estudu ne’ebé CARE Internasionál halo ba labarik kuaze rihun rua iha eskola públika hamutuk 99 iha área rurál no remota iha munisípiu haat; dadus ne’e la reprezenta dadus nasionál.

“Bazeia ba fallansu dadus ne’ebé ha’u fó sai ba ona ba públiku iha loron 30 jullu 2019 liuhusi workshop ne’ebé realiza husi CARE Internasionál iha otél Ramelau ne’e ha’u halo ona retifikasaun,” konfirma Diretór Jerál, Cidalio Leite ba Ajénsia TATOLI iha nia Gabinete, Ministériu Edukasaun, Juventude no Desportu (MEJD), Vila Verde, segunda (13/08/2019).

Tuir Diretór Cidalio katak retifikasaun ne’ebé nia halo ona ne’e bazeia ba lei Komunikasaun Sosiál iha artigu 34 (Kondisaun sira efetiva nian) ne’ebé fó dalan ba nia atu uza kompeténsia legál atu hadi’a hodi nune’e bele redús polémika iha públiku inklui hatún  dignidade estadu Timor-Leste nian iha mundu.

Molok atu halo retifikasaun ba daudaun ne’e, Diretór Cidalio Leite informa katak nia rasik hasoru malu ona ho Ministra Edukasaun Juventude no Desportu, Dulce de Jesus Soares hodi halo klarifikasaun kona ba informasaun ne’ebé nia fó sai.

Nune’e, tuir nia, ministra rasik husu direita atu toma responsabilidade hodi hadila fila fali informasaun sira atu labele hatún Timor-Leste nia imajen iha mundu.

Antes ne’e, Ministériu Edukasaun, Juventude no Desportu (MEJD) mós halo ona konferénsia imprensa ho klarifika informasaun ba públiku no rejeita dadus CARE Internasionál nian ne’ebé fó sai katak estudante pré-eskolár 79% mak la hatene lee ne’e.

Nune’e mós, Ministra Edukasaun Juventude no Desportu, Dulce de Jesus Soares informa ba jornalista sira iha Palásiu Governu, kuarta (07/08/2019) katak dadus ne’ebé iha MEJD nia liman hatudu katak labarik 92% bele lee 21 letras.

Governante ne’e haktuir, teste ne’ebé mak dirasaun Ministériu Edukasaun hamutuk ho CARE Internasionál halo ba estudante rihun rua iha Munisípiu haat ne’e la konsidera. Nia dehan teste ne’ebé halo ba eskola 100 ho totál estudante rihun rua ne’e ho padraun EGRA (Early Great Reading Assessment) ho letra maibé la tuir orden.

Teste ne’e fó tempu minutu ida nia laran ba labarik sira, depois kuandu husu fali labarik sira tenke hateten letra sira ne’e tuir ninia dalan. Entaun husi kapasidade labarik rihun rua ne’e hatudu rezultadu katak iha labarik 92% ne’e bele lee 21 letras.

“Ita haree didi’ak fali husi indikadór internasionál nian katak labarik ida mak hatene lee letra 21, ne’e di’ak tanba iha labarik 92% mak koñese letras ho di’ak. Agora ita-nia diretór ne’e mak interpreta dadus ne’e laloos,” konsidera ministra.

Ministra esplika, la’ós labarik porsentu husi labarik mak la hatene lee maibé númeru letras 21 ne’e mak labarik sira konsege lee ona.

“Ha’u husu ona ha’u-nia diretór ne’e atu retifika ninia interpretasaun kona-ba gráfika ne’ebé laloos no ha’u mós haruka ona karta ba embaixadór estadus unidus nian ne’ebé fó apoiu ba organizasaun CARE atu ba oin kuandu fó sai informasaun ruma tenke husu Ministériu Edukasaun ninia verifikasaun uluk hodi nune’e labele hatún fali dignidade estudante Timor nian,” informa Ministra Dulce de Jesus Soares.

Notísia relevante:Peskiza: Labarik 90% Seidauk Asesu Ba Nutrisaun Di’ak

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here