Diretora Jerál Eletrisidade Timor-Leste (EDTL), Arlinda Miranda Manetelo. Foto/Mídia MOP.

DILI, 13 agostu 2019 (TATOLI)-Diretora Jerál Eletrisidade Timor-Leste (EDTL), Arlinda Miranda Manetelo, informa fiu milímetru (mm) 16 no kontadór iha armazein hahú menus ona nune’e difikulta tebes servisu EDTL nian.

“Ita kuaze tinan rua, hahú husi 2017 to’o 2018 laiha osan atu halo akizisaun ba ekipamentu, ne’ebé iha armazein sasán laiha hotu”, Diretora Jerál EDTL afirma ba Ajénsia Tatoli iha kna’ar fatin Kaikoli, ohin.

Arlinda Miranda salienta daudaun ne’e, Ministériu Obra Públika (MOP) loke ona konkursu públiku atu halo akizisaun ba ekipamentu hodi fasilita EDTL fó atendimentu ba konsumidór sira ho di’ak.

“Fiu ho kontadór agora iha armazein laiha hanesan fiu 16 mm atu dada husi liña tranzmisaun ba distribuisaun mai to’o kada umakain ne’e kuaze EDTL laiha”, katak.

Ba kontadór, nia dehan foin daudaun iha 30.000, maibé fahe balun ba munisípiu sira no balun iha Dili, ne’ebé monta ona ba kada umakain ou konsumidór sira, nune’e  iha armazein mós hotu ona.

“Agora, ita hein hela kompañia sira ne’ebé tuir konkursu ona iha Ministériu Obra Públika atu halo akizisaun”, nia dehan.

Iha portál MOP nian ne’ebé Tatoli asesu ohin, sobre konkursu públiku, Diresaun Jerál Administrasaun no Finansa liuhosi Diresaun Nasionál Aprovizionamentu (DNA) hahú loke iha loron 17-7-2019 to’o 31-7-2019 ho númeru referénsia NCB-MOP 190082, deskrisaun ba projetu mak supply and  delivery of EDTL Transformers and Accessories ho kustu orsamentu U$144,970.00.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here