iklan

EKONOMIA, HEADLINE

EDTL Garante Eletrisidade Lakan Normál iha Ámbitu Selebrasaun 30 Agostu

EDTL Garante Eletrisidade Lakan Normál iha Ámbitu Selebrasaun 30 Agostu

Diretora Jerál Eletrisidade Timor-Leste (EDTL), Arlinda Miranda Manetelo. Foto/Mídia MOP.

DILI, 13 agostu 2019 (TATOLI)-Diretora Jerál Eletrisidade Timor-Leste (EDTL), Arlinda Miranda Manetelo, hatete EDTL hahú esforsu atu garante distribuisaun liña eletrisidade iha ámbitu selebrasaun loron konsulta populár tinan 20 (30 agostu 1999-2019) no misaun INTERFET (Forsa Internasionál ba Timor Leste).

“Ami EDTL mós simu orientasaun ka despaxu ida husi Primeiru-Ministru, Taur Matan Ruak, atu asegura distribuisaun liña eletrisidade iha loron 30 agostu hodi lakan ho di’ak”, Diretór Jerál EDTL ba Ajénsia Tatoli iha kna’ar fatin Kaikoli, ohin.

Ho despaxu husi Xefe Ezekutivu, diretora Arlinda dehan hahú inísiu fulan ne’e (agostu) ekipa EDTL hala’o preparasaun atu asegura distribuisaun eletrisidade atu lakan ho kualidade no labele mate-lakan iha loron 30 agostu.

Tanba ne’e, nia salienta ekipa téknika EDTL esforsu maka’as hodi kontrola liña distribuisaun eletrisidade iha loron sesta no sábadu halo hela manutensaun atu labele avaria iha kapitál.

Aléinde ne e, nia adianta Primeiru-Ministru mós husu atu ekipa téknika haree no halo reparsaun lampu sira iha estrada, otél sira ne’ebé bainaka sira sei hela, Palásiu Nobre Lahane no área Tasi-Tolu atu garante ahi lakan normál no di’ak.

“Ami kontinua servisu hamutuk ho liña interministeriál sira ho esperansa hodi garante ahi lakan normál iha selebrasaun loron 30 agostu”, Diretora Jerál EDTL ne’e garante.

Jornalista: Florencio Miranda Ximenes

Editora : Maria Auxiliadora

iklan
iklan

Leave a Reply

iklan
error: Content is protected !!