Primeiru-Ministru, Taur Matan Ruak (Klaran) Akompaña Embaixadór Uniaun Europeia, Alexandre Leitão (Loos) ho Delegasaun Uniaun Europeia iha Timor-Leste relativa ho Missaun ida Ne’ebé lidera hosi Perito ida kona-ba "Analise para a Decisao Economia" (ADE). iha Palásiu Governu, Tersa, (13/08/2019). Imajen/TATOLI

DILI, 13 agostu 2019 (TATOLI) – Primeiru-Ministru (PM), Taur Matan Ruak, simu delegasaun husi Uniaun Europeia (UE) iha Timor-Leste, relativa ho misaun ne’ebé lidera hosi péritu ida kona-ba “Analise para a Decisão Economia” (ADE), hodi verifika finansiamentu Governu iha infraestrutura.

Embaixadór UE, Alexandre Leitão, informa nia parte lori delegasaun téknika sira ne’ebé antes ne’e halo ona enkontru balun iha Timor-Leste, para bele verifika kuadru finansiamentu estratéjiku iha área infraestrutura no bele aliña ho Objektivu Dezenvolvimentu Sustentável (ODS).

Embaixadór Uniaun Europeia, Alexandre Leitão. Imajen/TATOLI

“Primeiru-Ministru simu delegasaun, tanba ne’e ami mai hasoru hodi rona esplikasaun detalladu kona-ba opsaun estratéjiku husi Governu, relasiona ho infraestrutura no investimentu iha kapitál sosiál, husi parte seluk governasaun nian no ekilíbriu ne’ebé Governu hakarak mantein iha tempu badak no tempu naruk”, dehan Alexandre ba jornalista sira iha Palásiu Governu, iha tersa ne’e.

Nia haktuir, ekipa ne’e durante semana ida hasoru ona ho ministériu relevante sira, entidade públika sira no sosiedade sivíl.

“Avalia pertinénsia investimentu no kondisaun investimentu, no mós internasionál, tanba ne’e ami ko’alia ho autoridade oioin”, nia akresenta.

Nia hatutan: “Ami mai hare saida mak presiza, saida mak Timor-Leste hakarak halo iha futuru no oinsá bele enkuadra iha perspetiva finansiamentu, ami seidauk ko’alia ba valór konkretu”.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here