Prezidente CNE, Alcino Barris. Foto CNE

DILI, 13 agostu 2019 (TATOLI)–Komisaun Nasionál Eleisaun (CNE-sigla portugés), hato’o relatóriu eleisaun hamutuk tolu ba Primeiru-Ministru, Taur Matan Ruak.

“Ami hato’o relatóriu eleisaun tolu ne’ebé konklui ona iha 2018 nian ba señor Primeiru-Ministru”, Prezidente CNE, Alcino Barrís, ba jornalista sira, iha Palásiu Governu, tersa ne’e.

Enkontru ne’e hala’o hafoin CNE halo audiénsia. CNE mós aprezenta programa peskiza ba Xefe Governu kona-ba atu revee fali atividade ne’ebé hala’o ona ligadu ba ba aktu eleitorál, peskiza ne’e CNE konklui ona.

“Iha tempu badak ami sei halo workshop ida para divulga sai rezultadu loloos”, nia subliña.

Prezidente CNE ho estrutura hato’o ba Primeiru-Ministru, kona-ba orsamentu ne’ebé aloka ba partidu polítika sira no halo auditória ho rigór, hetan mós kooperasaun di’ak hosi partidu polítiku sira, liliu asentu Parlamentár.

“Orsamentu aloka ba sira tinan ida ne’e %75, maibé %25  sei konklui iha setembru”, Alcino esplika.

CNE mós aprezenta ba Xefe Governu kona-ba lei balun presiza halo revizaun. Nune’e mós proposta lei ida hodi halo ba dekretu lei kona-ba sekretariadu permanente.

“Resposta ba ami-nia preokupasaun, iha tempu badak Primeiru-Ministru sei haree proposta lei hirak ne’e no fó motivasaun no korajen ba ami, hodi aumenta tan frekuénsia serbisu hamutuk ho partidu polítiku sira”, dehan nia.

Xefe Governu enkoraza CNE atu hametin kooperasaun organizasaun internasionál sira, hodi lori CNE ba oin, nune’e garante demokrasia di’ak liu iha rai-laran.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here