DILI, 13 agostu 2019 (TATOLI)-Atu asegura ai-horis sira buras no hamatak sidade Dili, brigada Bombeiru Munisípiu Dili pro-ativu rega jardín sira iha Dili laran.
Notísia Relevante : Fatin Komemorasaun Konsulta Populár Atinje Porsentu 55
Atividade ne’e nu’udar preparasaun ba festa konsulta populár ba dala-20 (30 agostu 1999-30 agostu 2019) no prezensa misaun INTERFET iha Timor-Leste , 20 setembru 1999.
“Ami Bombeiru oras ne’e hala’o ona servisu rega jardín hotu iha Dili laran dala rua, kada loron, hodi kumpre orden ne’ebé mai hosi prezidente komisaun organizadora ba komemorasaun tinan 20 loron konsulta popular, Maun Boot Kay Rala Xanana Gusmão,” hateten Diretór Jerál hosi Sekretáriu Estadu Protesaun Sivíl, Superintendente Asistente Polisia Nasionál Timor-Leste (PNTL), Ismail da Costa Babo, ohin, ba TATOLI iha ninia serbisu fatin, Caicoli, Dili.
Notísia Relevante : 25 Agostu, BTK Finaliza Konstrusaun Jardín B.J. Habibie
Ismail Babo esklarese jardín sira ne’e maka Jardim 5 Maiu Kolmera, Jardim Largo Lesidere, Jardín Balai Prajurit, Mandarin, no seluk tan.
Atu jardín sira ne’e labele estraga hosi ema irresponsabilidade sira, Sekretáriu Estadu Protesaun Sivíl destaka mós pesoál seguransa patrimóniu públiku hodi fó seguransa.
Jornalista : Nelson de Sousa
Editór : Francisco Simões
