Segundu Komandante PNTL Munisípiu Dili, Superintendente Asistente, Euclides Belo. Imjaen/Eugénio Pereira

DILI, 13 agostu 2019 (TATOLI)-Komandu Polisia Munisípiu Dili kaptura ona suspeitu na’in hitu (7) ne’ebé envolve iha kazu baku malu entre joven iha festa ida iha Suku Hera, Postu Administrativu Kristu Rei, Munisípiu Dili.

Segundu Komandante Polisia Nasionál Timor Leste (PNTL) Munisípiu Dili, Superintendente Asistente, Euclides Belo dehan, suspeitu sira ne’e PNTL kaer iha  sábadu (10/08/2019), tanba kondisaun lanu hodi hamosu dezentendimentu iha festa laran.

Suspeitu sira ne’e detein ona iha sela Polisia Caicoli Dili kumpre ona oras 72 no ohin lori ona ba Tribunál Dili.

“Akontese mós problema ida iha Hera, partisipante sira mai tuir festa ne’e konsumu alku (hemu tua) depois mosu dezentendimentu sira baku malu, PNTL kaptura suspeitu na’in hitu  (7) ohin dadeer lori fali ba tribunál hodi submete ba primeiru interrogatóriu,” informa Euclides Belo, ohin, ba jornalista iha Komandu PNTL Caicoli, Dili.

Parte seluk, Komandu Polisia Munisípiu Dili detein hela suspeitu mane ida ho inisiál JPC ne’ebé lanu baku rahun sasán uma laran (Danu Violénsia). Suspeitu ne’e PNTL kaer, hafoin simu keixa hosi komunidade sira.

Kazu ne’e rasik akontese iha loron 12 agostu, tuku 03:00  dadeer, iha Aldeia Crecat, Suku Bairru-Pité, Don Aleixo, Munisípiu Dili.

“Agora ita detein hela suspeitu JPC iha sela ba kazu asaltu malu ne’ebé akontese iha Aldeia Crecat,” tenik nia.

PNTL sei halo investigasaun kle’an ba suspeitu hodi submete kazu ne’e ba Ministériu Públiku.

Euclides Belo dehan, durante semana primeiru husi fulan Agostu 2019, situasaun seguransa la’o di’ak no parte PNTL asegura seguransa iha selebrasaun loron Idul Adha iha  Meskita Kampung Alor Dili  la’o di’ak.

Alende ida ne’e, Komandu Dili simu mós konvite hosi Embaixada Indonézia atu halo seguransa ba selebrasaun loron independénsia Indonézia ne’ebé sei hala’o iha Embaixada Indonézia ba Timor-Leste iha loron 17 agostu agora.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here