SEKoop, Arsénio Pereira da Silva, foto hamutuk hafoin sosializa kna'ar SEKoop nian ba abitante Suku Funar.

Laklubar, 13 agostu 2019 (TATOLI)-Abitante suku Funar, postu administrativu Laklubar, munisípiu Manatutu, Mateus Soares, apresia tebes ho servisu Sekretáriu Estadu Kooperativa (SEKoop), Arsénio Pereira da Silva, tanba iha inisiativa di’ak hodi apoia grupu kooperativu sira no hanorin sira labele dependénsia ba Governu.

Mateus Soares, hatete nia apresia ho esforsu SEKoop ne’ebé komesa apoia grupu kooperativu sira liuhusi kuda shorgum (batar ain-naruk) no mós halo parseiru ho Movimentu Kamponezes Timor-Leste (MOKATIL) hodi ajuda to’os-na’in sira hodi halo produsaun ba hahán tradisional sira.

“Sekretáriu Estadu Kooperativa daudaun ne’e esforsu hodi apoia ami agrikultór sira iha baze oinsá kria grupu kooperativa sira atu tau hamutuk produtu lokál sira ne’ebé maka prodús hodi fa’an iha merkadu”, dehan nia iha ámbitu sosializasaun polítika Governu Daualuk liga ba knaar SEKoop nian ne’ebé hala’o iha suku Funar, tersa ne’e.

Nune’e nia husu ba SEKoop hodi mantén politika ne’e ba oin ho diak liután. “Tenke kontinua ho polítika SEKoop ne’ebé daudaun ne’e iha, labele mate no iha kontinuidade”, afirma.

Hatán ba pedidu ne’e, SEKoop, Arsénio Pereira, dehan dezde nia simu pose iha loron 22 juñu 2018, komprometidu ona hodi serví povu.

Governante ne’e mós fundamenta liután katak iha Konstituisaun mós hatete iha setór tolu maka sai xave importante ba Governu mak setór públiku, setór privadu no setór kooperativa.

Tanba ne’e Oitavu Governu rasik liuhusi Primeiru-Ministru, Taur Matan Ruak, fó prioridade ba setór kooperativa oinsá kria kondisaun di’ak ba povu liuhusi kooperativa atu hasa’e rendimentu ekonomia familiár.

“Sekretáriu Estadu Kooperativa ne’ebé maka ha’u lidera sei buka meiu oioin hodi otimaliza kooperativa nune’e fó apoia ba ita nian grupu kooperativa sira atu hasa’e kreximentu ekonomia iha rai-laran no sei mantén polítika ne’ebé SEKoop rasik daudaun ne’e iha no ha’u rasik garante Governu seluk mai sei hatutan saida maka Sekrétariu Estadu Kooperativa halo, tanba ne’e sei la mate no sei iha ninia kontinuidade”, Arsénio garante.

Governate ne’e haktuir grupu kooperativu daudaun ne’e iha 190 tuir dadus SEKoop nian, maibé 40 maka eziste. Ho ida ne’e, SEKoop sei apoia hodi nune’e bele iha nia progresu ne’ebé di’ak.

Atu atinje ida ne’e, grupu sira tenke iha espíritu jestaun ne’ebé di’ak, nune’e bele lori kooperativa ne’e bá oin hodi fó benefísiu ba sira.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here