Ofisiál Lalenok United FC protesta desizaun árbitru prinsipál, domingu (11/8). Imajen Mídia LFA

DILI, 13 agostu 2019 (TATOLI)—Órgaun Ezekutivu Liga Futeból Amadora (LFA), liuhosi Konsellu Étika no Disiplina desidi iha The City Hotel, Vila Verde, tersa (13/8), adi’a ka muda jogu entre ekipa Boavista FC no Lalenok United FC ba iha kuarta (14/8) tuku 7.00 otl, iha Estádiu Munisipál Dili, hodi kompleta fali tempu ne’ebé sei falta minutu 22.

Antes ne’e, ekipa rua ne’e hala’o jogu iha loron dominggu (11/8) maibé tenke paradu ho rezultadu golu 1-1 iha minutu ’68 tanba akontese infrasaun kauza hosi ofisiál no jogadór hosi klube Lalenok United FC, la aseita ho desizaun árbitru prinsipál ne’ebé lidera jogu entre ekipa rua.

Ho asaun ida ne’e maka Konsellu Disiplina no Étika, konsidere katak atu infrasaun refere nu’udar hahalok indisiplinár no laiha étika despostiva hosi ofisiál no jogadór Lalenok United FC.

Aleinde ne’e, Konsellu mós fó sansaun ka suspensaun jogu ba ofisiál Lalenok United na’in rua atu labele akompaña jogu dala tolu tutuir malu. Kontinua desidi hodi fó lejitimasaun ba desizaun árbitru prinsipál hodi fó suta penaltu ba ekipa Boavista FC, bazeia ba kompeténsia tomak ne’ebé iha tuir artigu ‘5 LAW OF THE GAME.

Konsellu ne’e mós kontinua fó orientasaun ba árbitru, Jaime Gonçalves, atu mantein lidera jogu kontinuasaun refere to’o ramata, no mós desidi katak sei la fó lisensa ba adeptu klube rua atu asisti jogu aban.

Edisaun: Xisto Freitas

HAKEREK NO HATÁN

Please enter your comment!
Please enter your name here