Prezidente Autoridade Munisipál Ermera, José Soares

ERMERA, 12 agostu 2019 (TATOLI)—Prezidente Autoridade Munisipál Ermera, José Soares, hateten produsaun kafé Ermera ba tinan ida ne’e menus liu, tanba impaktu hosi rai-manas.

Nia esplika, produsaun ne’e menus tanba ai-mahon barak mak tohar ona. Uluk produsaun kafé kapa’as tanba ai-samtuku sira fó mahon.

Tuir José katak ai-samtuku ne’e importante ba kafé no se ai-mahon laiha, kafé la tahan ho loron manas. Kafé robusta sei bele moris tahan, maibé arabika, lae.

“Tanba ne’e mak produsaun kafé ba tinan ida ne’e tún aat liu. Iha tinan 2015, ninia persentájen esportasaun ne’e iha tonelada rihun 14, maibé ohin loron (tinan 2019) tuir dadus ne’ebé ami hetan, tún ona ba tonelada 6,” nia tenik ba jornalista sira, iha Aifu, Suku Poetete, Postu Administrativu Ermera Vila, Munisípiu Ermera, segunda ne’e.

Nia hatutan, iha periodu tinan lima nia laran ne’e, produsaun kafé tún aat loos, tan ne’e presiza serbisu hamutuk ho Ministériu Agrikultura no Peska para ba oin kuda fali ai-kafé, la’ós kuda ai-samtuku, tanba ai-samtuku ida agora ne’e moras kona ona.

Iha fatin hanesan, Xefe Aldeia Likisi, Suku Poetete, Aleixo Martins, hateten produsaun kafé tún tanba maioria kafé iha Ermera tuan ona no laiha reabilitasaun.

“Kafé ne’e durante tinan barak, hahú hosi tempu portugés to’o agora, laiha reabilitasaun ne’e mak halo produsaun kafé menus. Ami akompaña iha televizaun dehan Governu tau osan ba reabilitasaun, maibé realidade ami-nia kafé sira ne’e tuan hotu ona, laiha reabelitasaun,” nia haklaken.

Nia esplika, kafé Arabika oras ne’e ho folin dollar ida resin/kilo, depois tún ba dollar ida. Kafé robusta ho folin sentavu 0,60/kilo.

“Ne’e ba kafe maran. Se ho kulit tasak, folin sentavu 0,34 de’it, tanba NCBA dehan folin kafé iha merkadu internasionál tún. Ida ne’e halo ami triste tebes ho kafé nia folin. Uluk ne’e, kafé kulit tasak ho folin sentavu 0,60, agora tún aat liu,” katak xefe aldeia Likisi ne’e.

Jornalista: Evaristo Soares Martins

Editór: Xisto Freitas

1 KOMENTÁRIU

  1. Cafe iha Ermera Produsaun Menus Tamba impakto husi menus konhesimento husi toos Nain sra atu bele halo Manutensan ba Cafe.Iha parte Ida mos Cafe 🌲 Sira nee Maiorio Tuan hotu ona(La Produtivo) Toos Nain mos la tau atensaun atu bele kuda foun Cafe iha toos.
    Ministerio dan Agricultura e Pescas
    Liu Liu ba Ekstensionista Suco Sira Persiza halo Ekstensaun ho Diak ba Area Cafe.
    Atu hasae Produsaun Cafe nebe Diak Persiza:
    1.Coopersaun Toos Nain ho Ekstensionista Sira iha Sira Nia Servico lorloron.
    2.Ektensionista Sira tenki iha Plano no Inovativo neebe Diak hodi hanorin toos Nain Cafe
    3.Persiza Kuda Plantasaun foun hanesan Aimahon Cafe.no Variedade Cafe
    Importante Liu MK Manutensan Diak ba cafe atu nunee bele Garante Produsaun Cafe kada epoka Koilheta.

HAKEREK NO HATÁN

Please enter your comment!
Please enter your name here