Xefe Kaza Militár Prezidénsia Repúblika, Koronél Maucalo, reprezenta Prezidénsia Repúblika, lee mensajen ba komunidade Musulmanu iha loron Idul Adha, iha Mesquita An’nur, Kampung Alor. Imajen: Mídia PR.

DILI, 11 agostu 2019 (TATOLI) – Prezidente Repúblika (PR), Francisco Guterres Lú Olo, hato’o mensajen ba komunidade musulmana timoroan, ne’ebé selebra loron Idul Adha, katak loron ne’e nu’udar eventu ne’ebé fó hanoin espíritu umanu murak ida no rekoñese ita tenke tau matan ba malu.

“Unidade ita-nian hametin ho sentimentu katak ita hotu timoroan de’it. Relijiaun ka fiar seluk la-haketak ita maibé hariku ita, nu’udar Povu no Nasaun”, tenik PR iha loron Idul Adha, domingu ne’e.

Xefe Estadu fó mós kontributu kiik ida atu ajuda hametin espíritu, nu’udar fiar na’in.

“Iha loron-ohin maun, bin, no alin musulmanu sira lolo bikan ba malu no lolo mós bikan ba fiar nain sira seluk”, nia akresenta.

Nia hatutan: “Liuhosi eventu sira hanesan ne’e, ita haree ba malu nu’udar ema no nu’udar mós membru pertense ba família boot ida, moris hamutuk iha uma-kain ida de’it, Timor-Leste”.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here