Ministru Agrikultura no Peska, Joaquim José Gusmão dos Reis Martins.

DILI, 12 agostu 2019 (TATOLI)-Ministru Agrikultura no Peska, Joaquim José Gusmão dos Reis Martins, despede ona estudante hamutuk 73 ne’ebé sei bá aprende agrikultura moderna iha Arava International Center for Agriculture Training (AICAT) iha Izraél durante tinan ida.

“Serimónia ohin nu’udar serimónia despedida ba estudante hamutuk 73 bá Arava International Center for Agriculture Training (AICAT) hodi aprende agrikultura moderna”, Ministru Joaquim hatete iha salaun Ministériu Agrikultura no Peska (MAP) Komoro, ohin.

Governante ne’e haktuir, ida ne’e nu’udar koopersaun ne’ebé maka antes ne’e Governu Timor-Leste liuhusi MAP no Governu Izraél halo ona hodi haruka estudante sira ne’ebé iha koñesimentu iha área agrikultura ka sira ne’ebé iha agrikultura bá tuir formasaun iha Izraél.

Estudante sira ne’e sei estuda planu negósiu, marketing management no lideransa (leadership) no liuliu iha área ortikultura nian hanesan oinsá kuda tomate, pateka ho meiu modernu sira ne’ebé maka sira sei aprende oinsá maka prepara fini, prepara rai ho di’ak to’o prosesu kolleita.

Ministru ne’e salienta hafoin estudante sira fila mai Governu iha devér tomak sei akompaña nafatin sira liuhusi insentiva sira maka Governu sei fó bainhira sira hahú halo planu ruma.

Tuir governante ne’e katak rezultadu kooperasaun rasik hahú hatudu pasu pozitivu tanba estudante sira ne’ebé maka bá tuir formasaun iha Izraél durante iha etapa dahaat nian, foin daudaun fila mai balun kria ona kretividade balun.

“Hanesan iha munisípiu Likisá alumi etapa dahaat nian, ema na’in-haat komesa prodús ona pateka, fore-keli, brinjela no sira hahú ona fornese bá iha supermerkadu sira ne’e”, ministru katak.

Tanba ne’e ministru Joaquim enkoraja estudante sira atu aproveita oportunidade ne’ebé iha ho másima maski hetan dezafiu oioin, maibé tenke pasiénsia hodi aprende nune’e fila mai Timor-Leste bele halo netik saida maka aprende iha ema nia rai.

Hatán kona-ba preokupasaun públiku nian katak bainhira Governu haruka tiha estudante sira bá li’ur hodi estuda, maibé ikus mai abandona no la aproveita sira,  Ministru Agrikultura no Peska hatete la’ós ona tempu para buat hotu Governu insentiva, maibé depois de estudante sira fila, sira rasik maka tenke hatene ona área saida maka sira atu halo nune’e bele kontribui ba nasaun.

“Ita la’ós ona tempu para buat hotu Governu fó hela de’it, tempu Governu fó hela de’it natoon ona. Ita aprende iha ita nian pasadu buat sira ne’ebé maka Governu fó de’it ne’e rezultadu mukit tebes-tebes, tanba ne’e maka ita hakarak fó fila buat ne’e ba formandu sira, kapasita sira hetan matenek ona sira komesa. Sira kuandu komesa ona ministériu iha koopersaun ho sira nafatin hodi tau-matan fali se sira prezisa atu habelar tan”.

Tanba ne’e mak Ministru Joaquim dehan tenke komesa ona enkorja no fó ona responsabilidade ba joven sira para iha brani hodi bele hahú serbisu através halo atividade ruma. Tanba sira ne’ebé daudaun bá estuda iha Izraél ne’e, aprende teoria 25% no prátika 75%, nune’e sira bele aplika bainhira fila mai.

“Ita labele fó de’it no fó de’it, se lae ita sai Governu ida que fó hela de’it ba no la eduka ita nian sidadaun joven sira atu aprende no halo buat ruma, ita kria fali dependénsia ba Governu, ita tenke muda ona ida ne’e”, tenik ministru Joaquim.

Diretór Nasionál Formasaun Téknika Agrikultura MAP, Hipólito da Costa, hatete estudante.grupu rua sei arranka aban no grupu ida seluk sei bá iha 15 agostu. Perante sira-nia estudu sira sei hela hamutuk ho agrikultura sira iha Izraél no tuir regra normál iha prosesu estudu, sira aprende prátika hamutuk loron haat iha terenu no loron ida iha sala-de-aula.

Tuir kritéria ne’ebé maka AICAT iha maka estudante tenke idade 28, labele liu no background tenke lisensiadu ka estudante iha agrikultura ho kondisaun saúde tenke di’ak no hakarak aprende duni no hatene uitoan lian inglés.

Nia dehan kona-ba selesaun ba tinan tuirmai liuhusi programa ne’e, MAP sei hala’o iha nivel munisípiu to’o suku, nune’e hili estudante sira ne’ebé iha vontade bainhira fila bele dezenvolve sira nian suku ho di’ak.

Reprezentante estudante AICAT ba etapa dalimak, Gapar Gomes, hatete sira kompremetidu atu hatudu vontade ne’ebé di’ak iha ema nian rai durante estudu, nune’e fila bele kontribui ba dezenvolvimentu.

Estudante sira ne’ebé maka bá hamutuk 70 no best estudent husi etapa dalimak iha rua no inklui team leader ida, totál hamutuk 73.

Iha ámbitu despedida ne’e, Ministu Agrikultura no Peskas Joaquim José Gusmão, fahe mós pasaporte, billeti viajen no atributu hanesan farda, ID Card no xapeo ne’ebé estudante sira sei uza.

Iha serimónia ne’e aléinde partisipa husi Ministru Agrikultura no Peska, iha mós Sekretáriu Jerál MAP, Cesar da Cruz, diretór, dosente no família husi estudante sira.

Notísia relevante : MAP Sei Haruka Estudante 72 bá Izraél Aprende Agrikultura Moderna

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here