Autoridade seguransa no komunidade Postu Administrativu Atauro simu vizita Komandante PNTL, Komisáriu Faustino da Costa ho Vise Ministra Saúde ba Kuidadu Saúde Primaria, Elia A.A. dos Reis, iha Atauro Vila, sesta (09/08/2019). Imajen/Eugénio Pereira

ATAURO, 10 agostu 2019 (TATOLI)-Administradór Postu Administrativu Atauro, Munisípiu Dili, Mateus Belo apresia akordu ne´ebé estabelese entre Polísia Nasionál Timor-Leste (PNTL) no Ministériu Saúde (MS) hodi fasilita ró transporta pasiente sira husi Atauro mai Dili no vise-versa.

“Lori autoridade no komunidade nia naran apresia tebes ba apoiu ida ne’e no ida ne’e bele hafasil liután  komunidade sira ne’ebé hetan moras  grave bele evakua lalais hodi ba halo tratamemtu iha Dili,” dehan Administradór Postu Administrativu Atauro, Mateus Belo ba Ajénsia TATOLI iha Suku Beloi, sesta (09/08/2019).

Administradór Mateus Belo hateten, Atauro haketak ho tasi maibé liga ba tratamentu saúde sempre iha difikuldade barak liuliu ba  pasiente sira ne’ebé moras grave  atu ba tratamentu iha Dili; difisil tebes, tanba ne’e mak liuhusi MS estabelese akordu kooperasaun ho komandu PNTL, liuhusi Unidade Polisia Maritíma (UPM) apoiu ró ida fasilita transporta pasiente sira hodi konsulta iha Dili.

“Akordu kooperasaun ne’e  bele loke dalan ona no espasu ida ba komunidade sira iha Atauro hetan tratamentu di´ak liután liuhusi apoiu UPM,” hateten autoridade másimu Atauro ne´e.

Nia dehan, ba futuru governu sira tenke kria polítika ne’ebé di´ak hodi bele kontinuasaun fali ho aviaun tanba dalan ne’ebé di´ak oinsá atu lori  pasiente sira ne’ebé moras grave sira ho aviaun bele lalais liu tanba lori ró maritíma ne’e presiza lori oras kuaze oras ida, selae oras ida ho balun.

Iha biban hanesan, Administradór Postu Administrativu, Mateus Belo sujere mós ba governu oinsá atu kria polítika ida hodi harii mini ospitál ida iha Postu Administrativu Atauro para moras emerjénsia sira la presiza evakua mai iha Dili.

“Hanesan iha akordu kooperasaun ne’e rasik ita-nia papel no ita-nia kontribuisaun hanesan autoridade lokál ba iha suku sira bainhira iha moras ida, ita lalais fó informasaun ba xefe sentru saúde sira hodi hatene lalais no oinsá bele atende lalais pasiente hirak ne’e tanba ita-nia esforsu hanesan liman ain estadu nian no oinsá hala´o serbisu besik liután ba komunidade,” tenik Administradór Mateus Belo.

Notísia relevante:PNTL ho MS Fasilita Ró Transporta Pasiente Hosi Atauro-Dili

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here