MAUBARA, 9 agostu 2019 (TATOLI) – Prezidente Repúblika (PR), Francisco Guterres Lú Olo, hateten povu hotu vota iha 1999 atu konfirma de’it luta naruk ne’ebé funu na’in sira reziste.
“Bainhira povu hotu vota iha 30 agostu 1999, hotu-hotu ba forma para tú ba ukun rasik-aan atu konfirma de’it saida mak Komandante Nicolau Lobato, Vicente Reis ‘Sahe’ ho sira seluk hahú tiha ona”, diskursu PR Lú Olo bainhira presta omenájen ba restu mortál Saudozu José Cirilo ‘Maubrani’, iha Maubara, sesta ne’e.
Xefe Estadu hatutan: “Sira mate liu-tiha ona maka ita halo ida ne’e, signifika obra ne’e hahú hosi sira no hakotu hosi ninia povu rasik hodi haketak Timor-Leste hosi Indonézia”.
PR haktuir, forsa barak mak mate no lideransa sira, maibé sira husik hela raan, isin no ruin iha rai ida ne’e nia leten.
Nune’e, ho luta naruk ne’e, obriga Organizasaun Nasaun Unida (ONU) sama-ain iha Timor-Leste iha tinan 1999 no povu sira hakarak ba referendu.
Xefe Estadu husu jerasaun foun sira ne’ebé moris iha funu laran no balun mak foin moris, tenke iha koñesimentu ba istória funu nian.
Lú Olo rekoñese, prosesu funu naruk ida ne’e difísil tebes hafoin povu desidi iha loron Konsulta Populár, 30 agostu.
“Finálmente, ita ukun rasik-aan. Tinan 16 ba tinan 17 ona hodi tau fila-fali eroi sira ne’ebé husik hela mai ita, buat ne’ebé sira defende to’o mate”, hateten Xefe Estadu.
Jornalista: Evaristo Soares Martins
Editór: Xisto Freitas
